زیاتر لە یەک تۆن گۆشت بەهۆی گومانی نەخۆشی لە کوشتارگەی هەولێر ڕەت کراوەتەوە

ئاڤا نیوز

ئاماری بەڕێوەبەرایەتی کوشتارگەی هاوچەرخی هەولێر دەریدەخات، لەماوەی دوو ڕۆژی جەژنی قوربان، 617 سەر ئاژەڵی گەورە و بچووک لەو کوشتارگەیە کراونەتە قوربانی و زیاتر لە هەزار کیلۆ گۆشتیش بەهۆی بوونی نەخۆشی ڕەتکراوەتەوە.

وێنە گەورەکە: ئەمساڵ بەهۆی بڵاوبوونەوەی تای خوێنبەربوون، وەک ڕێکاری خۆپارێزی ئاگاداری بە هاونیشتمانیان درا، ئاژەڵ لە ماڵان نەکەنە قوربانی و لە کوشتارگەکان قوربانی بکەن، چونکە بە وردی پشکنینی بۆ دەکرێت.

لێدوانی فەرمی: هەڵمەت هەمزە، بەڕێوەبەری کوشتارگەی هاوچەرخی هەولێر بە ئاڤا میدیای وت، ئەمڕۆ لە دووەم ڕۆژی جەژن، 289 سەر ئاژەڵ کراونەتە قوربانی، 59 ئاژەڵیان گەورە و 230 ئاژەڵیان بچووک بوون. ئەمە لە کاتێکدایە جەژنی قوربانی ڕابردوو لە دووەم ڕۆژدا 159 سەر ئاژەڵی گەورە و بچووک کرابوونە قوربانی. ئەمساڵ ژمارەی ئاژەڵی قوربانی لە کوشتارگە زیادیکردووە.

زانیاریی زیاتر: هەر بە پێی ئاماری کوشتارگەی هەولێر لە ماوەی دوو ڕۆژی جەژن، هەزار و 119 کیلۆگرام گۆشت بەهۆی گومان لە بوونی نەخۆشی ڕەتکراوەتەوە، ئەمەش بەراورد بە ساڵی ڕابردوو زیاترە، ساڵی پار لە دوو ڕۆژی جەژن، تەنیا 967 کیلۆگرام گۆشت ڕەتکرابووەوە.

ژمارەکان وا دەڵێن: ئاماری ئەمساڵ دەریدەخات ژمارەیەکی زیاتری ئاژەڵ براونەتە کوشتارگەکان بۆ قوربانی بەراورد بە ساڵی ڕابردوو، بەمجۆرەیە:

ساڵی 2024

یەکەم ڕۆژی جەژن  88 ئاژەڵی گەورە  291 ئاژەڵی بچووک
دووەم ڕۆژی جەژن  21 ئاژەڵی گەورە  138 ئاژەڵی بچووک

ساڵی 2025

یەکەم ڕۆژی جەژن  80 ئاژەڵی گەورە  248 ئاژەڵی بچووک
دووەم ڕۆژی جەژن  50 ئاژەڵی گەورە  230 ئاژەڵی بچووک