بەهۆی پابەند نەبوون بە ڕێنماییەکانی قوربانی پۆلیسی هەولێر 10 کەس دەستگیر دەکات

ئاڤا نیوز

لەماوەی دوو ڕۆژی جەژن، پۆلیسی قایمقامیەتی هەولێر لەگەڵ لیژنەیەکی چاودێری بازرگانی، 10 کەسیان دەستگیر کردووە کە بەدەر لە ڕێنماییەکان ئاژەڵیان سەربڕی بوو.

وێنە گەورەکە: بەر لە هاتنی جەژنی قوربان، قایمقامیەتی هەولێر ئاگاداری هاونیشتمانیانی کردەوە، بەهۆی بڵاوبوونەوەی تای خوێنبەربوون، سەربڕینی ئاژەڵ لە دەرەوەی کوشتارگەکان قەدەغەیە.

لێدوانی فەرمی: نەبەز عەبدولحەمید، قایمقامی هەولێر بە ئاڤا میدیای وت، لەماوەی دوو ڕۆژی جەژن،  10 کەس دەستگیرکراون، بەهۆی ئەوەی لە دەرەوەی کوشتارگە و بەدەر لە ڕێنماییەکان ئاژەڵیان سەربڕیووە. هەموویان ڕووبەڕووی دادگا دەکرێنەوە.

بەپێی وتەی قایمقامی هەولێر، بەدواداچوونی لیژنەکان تا چوارەم ڕۆژی جەژنی قوربان بەردەوام دەبێت.

ئەوەی پێویستە بیزانیت: تا ئێستا پێنج حاڵەتی تای خوێنبەربوون لە هەرێمی کوردستان تۆمار کراون و کەسێکیش گیانی لەدەستداوە. بەشی زۆری ئەوانەی تووشی تای خوێنبەربوون هاتوون کاری گۆشتفرۆشییان کردووە یان بەرکەوتنیان لەگەڵ ئاژەڵی تووشبوو هەبووە.