ڕووسیا تەرمی زیاتر لە هەزار سەربازی ئۆکراینی ڕادەست دەکات

ئاڤا نیوز

لە ئەنجامی ڕێککەوتنێکی نێوان ڕووسیا و ئۆکراینا لەبارەی ئاڵۆگۆڕکردنی دیل و سەربازەکانیان، هەردوولا ژمارەیەکی زۆر تەرمی سەربازە کوژراوەکانی جەنگ ڕادەستی یەکتری دەکەن و ڕووسیاش لەبارەی ئەم پرسەوە یەکەم هەنگاوی ئەنجامدا.

وێنە گەورەکە: لەمیانەی کۆبوونەوەکەی 2ی حوزەیران لە نێوان شاندی ڕووسیا و ئۆکراینا کە لە تورکیا بەڕێوەچوو، مۆسکۆ یاداشتی پێشنیازەکانی پێشکەش بە لایەنی ئۆکراینی کرد، تیایدا هەردوو شاند ڕێککەوتن لەسەر پرسی ئاڵۆگۆرکردن و  گەڕاندنەوەی تەرمی سەربازە کوژراوەکانی جەنگ.

لێدوانی فەرمی: ئەلێکساندەر زۆرین، وتەبێژی شاندی دانوستانکاری ڕووسیا ڕایگەیاند، ڕووسیا یەکەم  قۆناغی ڕادەستکردنی تەرمی سەربازانی ئۆکراینی گەیاندووەتە خاڵ و شوێنی ئاڵوگۆڕکردنەکە، ئەمەش وەک جێبەجێکردنی بنەماکانی ئەو ڕێککەوتنەی نێوان هەردوولا ئەنجامدراوە.

لەلایەکی دیکەوە: بەرپرسانی ڕووسیا دەڵێن، یەکەم قۆناغی ڕادەستکردن هەزار و 212  تەرمی سەربازی ئۆکراینی لەخۆگرتبوو. دەشڵێن، لایەنی ڕووسی بە تەواوی ئامادەیە هەموو ڕێککەوتننامەکانی پەیوەست بە گەڕانەوەی تەرمی سەربازەکانی ئۆکراینا و ئاڵوگۆڕی دیلەکان جێبەجێ بکات.