ئەحمەد شەرع پێشوازیی لە نێردەی تایبەتی سەرۆکوەزیرانی عێراق کرد

ئاڤا نیوز

سەرۆککۆماری سووریا، لە کۆشکی گەل لە دیمەشق، پێشوازیی لە نێردەی تایبەتی سەرۆکوەزیرانی عێراق بۆ سووریا دەکاتم بەڵام تاوەکو ئێستا هیچ وردەکارییەک لە سەردانەکە باس نەکراوە.

وێنە گەورەکە: حکومەتی عێراق، تا ئێستا بە شێوەیەکی فەرمی دانی بە دەسەڵاتی نوێی سووریا نەناوە. سەردانەکەی نێردەی سەرۆکوەزیرانی عێراقیش بۆ دیمەشق، وەک هەوڵێک دەبینرێت بۆ بەهێزکردنی پەیوەندییە دووقۆڵییەکانی نێوان ئەو دوو وڵاتە.

بڵاوکراوەی فەرمی: بەگوێرەی هەواڵێکی ئاژانسی هەواڵی سووریا "سانا"،  ئەحمەد شەرع، سەرۆککۆماری سووریا، لە کۆشکی گەل لە دیمەشق، پێشوازیی لە عیزەت شابەندەر، نێردەی تایبەتی سەرۆکوەزیرانی عێراق بۆ سووریا کرد. بەبێ ئەوەی هیچ وردەکارییەک لەبارەی سەردانەکە بخاتەڕوو.

ئەوەی پێویستە بیزانیت: لە مانگی نیسانی ڕابردوودا، سەرۆکایەتیی سووریا ڕایگەیاندبوو کە ئەحمەد شەرع لە دەوحە چاوی بە محەممەد شیاع سوودانی، سەرۆک وەزیرانی عێراق کەوتووە، ئەمەش بە نێوەندگیریی دەوڵەتی قەتەر و بە ئامادەبوون و سەرپەرشتیی شێخ تەمیم بن حەمەد ئال سانی، میری قەتەر.

لەلایەکی دیکەوە: زیاتر لە جارێکیش، ئەحمەد شەرع چاوی بە حەمید شەتر‌ی، سەرۆکی دەزگای هەواڵگریی عێراق کەوتووە کە ئەویش وەک نێردەی سەرۆکوەزیرانی عێراق سەردانی کردبوو. دیدارەکان بە ئامادەبوونی ئەسعەد شەیبانی، وەزیری دەرەوەی سووریا و ئەنەس خەتاب، سەرۆکی دەزگای هەواڵگریی سووریا بەڕێوەچوون.