نەتەوەیەکگرتووەکان: پێویستە کێشەکانی نێوان هەولێر و بەغدا بە گفتوگۆ چارەسەر بکرێن

ئاڤا نیوز

ئەنجومەنی ئاسایشی نەتەوەیەکگرتووەکان لەسەر ماف و قووتی هاوڵاتیانی هەرێمی کوردستان و دۆخی عێراق کۆبوویەوە و داوای کرد، پرسەکانی نێوان هەرێمی کوردستان و عێراق بەپێی دەستوور یەکلایی بکرێنەوە.

وێنە گەورەکە: بە بەشداری دکتۆر محەممەد ئەلحسان، نوێنەری تایبەتی سکرتێری گشتیی نەتەوەیەکگرتووەکان بۆ عێراق، ئەنجوومەنی ئاسایشی نەتەوەیەکگرتووەکان لەبارەی نەناردنی مووچەی هەرێمی کوردستان و دۆخی عێراق کۆبوونەوە.

لێدوانە فەرمییەکان:

. ڤاسیلی نەبێنزیا، نوێنەری ڕووسیا لە نەتەوەیەکگرتووەکان ڕایگەیاند، پێویستە پەیوەندییەکانی نێوان هەولێر و بەغدا پەرەی پێبدرێت بە شێوەیەک بۆ چارەسەرکردنی کێشەکانی نێوانیان، پێشوازی لە دەستپێکردنەوەی نەوت لە هەرێمی کوردستان بۆ بەندەری جەیهان دەکەین کە سوودی هەیە بۆ گەشەسەندنی ئابووری و کۆمەڵایەتی لە ناوچەکە، وڵاتەکە و گرنگە بۆ سەقامگیری هەرێمی کوردستان.

-    هەڵبژاردنی پەرلەمانی کوردستان سەرکەوتوو بوو و داوادەکەین لایەنەکان ناکۆکییەکان لە ڕێگەی دانوستانەوە چارەسەر بکەن.

. شوانگ، جێگری نوێنەری چین لە نەتەوەیەکگرتووەکان ڕایگەیاند، "پێشوازی لە باشترکردنی گفتوگۆکانی نێوان هەولێر و بەغدا بۆ چارەسەرکردنی کێشەکان دەکەین".

. کارۆلین کوین، جێگری نوێنەری بەریتانیا لە نەتەوەیەکگرتووەکان ڕایگەیاند، پێکهێنانی حکومەتی هەرێمی کوردستان بۆ سەقامگیری ناوچەکە گرنگە و "هیوادارین سەرکردە سیاسییەکان ناکۆکییەکانیان وەلابنێن و لە نزیکترین کاتدا حکومەت پێکبهێنن".

. جەی دارمادیکار، جێگری نوێنەری فەرەنسا لە نەتەوەیەکگرتووەکان ڕایگەیاند، "داوادەکەین گفتوگۆکان لە نێوان هەولێر و عێراق بۆ چارەسەرکردنی کێشەکانیان بەردەوام بێت و پێویستە کار بۆ باشترکردنی پەیوەندییەکانی نێوان هەولێر و بەغدا بکرێت".

. کریستینا مارکوس، نوێنەری دانیمارک لە نەتەوەیەکگرتووەکان ڕایگەیاند، "پشتیوانی گفتوگۆکانی نێوان هەولێر و بەغدا دەکەین".

. هوانگ جون کووک، نوێنەری کۆریای باشوور ڕایگەیاند، بۆ چەسپاندنی پێشکەوتنی سیاسیی گشتگیر و سەقامگیری ڕاستەقینە لە عێراق، زۆر گرنگە چارەسەری ئەو گرژییە چارەسەرنەکراوانە بکرێت، بەتایبەتی ئەوانەی هەرێمی کوردستان دەگرێتەوە.

- چارەسەرکردنی کێشە هەڵپەسێردراوەکانی نێوان هەولێر و بەغدا و تێپەڕاندنی ئاستەنگە نێوخۆییەکان زۆرگرنگە.

. ئیڤانجیلۆس سی سیکێریس، نوێنەری یۆنان لە نەتەوە یەکگرتووەکان، پێشوازی لە ئەنجامدانی هەڵبژاردنی پەرلەمانی هەرێمی کوردستان کرد و بە پێشهاتێکی ئەرێنی وەسفی کرد و ڕایگەیاند، ئێستا زۆر گرنگە سەرکردایەتی سیاسی کورد پێکەوە کار بکەن بۆ پێکهێنانی خێرای حکومەتێکی کاریگەر لە هەرێمی کوردستان.