ئەندامێکی ئەنجوومەنی پارێزگای نەینەوا: عێراق ناچێتە ژێر باری جێبەجێکردنی ڕێککەوتنی شنگال

ئاڤا نیوز

ئەندامێکی ئەنجوومەنی پارێزگای نەینەوا ڕایدەگەیێنێت، دۆخی ئەمنی شنگال لاوازە و هیچ خزمەتگوزارییەکیش نییە، ئاماژە بۆ ئەوەش دەکات حکومەتی عێراق ناچێتە ژێر باری جێبەجێکردنی ڕێککەوتنی شنگال.

وێنە گەورەکە: ڕۆژی 9ـی ئۆکتۆبەری 2020، ڕێككەوتنی شنگال لە نێوان حكومەتی عێراق و حكومەتی هەرێمی كوردستان بە چاودێریی مستەفا كازمی، سەرۆكوەزیرانی ئەوکاتی عێراق لە شاری بەغدا واژۆکرا، بەڵام تاوەکو ئێستا ڕێککەوتنەکە نەچووەتە بواری جێبەجێکردنەوە.

لێدوانی فەرمی: ئەحمەد کەنعان کیکی، ئەندامی ئەنجوومەنی پارێزگای نەینەوا لە لێدوانێکدا بە ئاڤا میدیای ڕاگەیاند: لە دۆخی شنگال ناڕازین، شنگال زیانێکی زۆرتری لە مووسڵ بەر کەوت. هاوکات لە ڕووی مەعنەویشەوە خەڵکی شنگال زیانێکی زۆریان بەرکەوت، ئێمە هەم لە ڕووی ماددی و هەمیش مەعنەوییەوە ناڕازین، خەڵکی شنگال هێشتا ئاوارەن.

لەلایەکی دیکەوە: سەبارەت بە ڕێککەوتنی شنگال، کیکی دەڵێت: نزیکەی پێنج ساڵە ڕێککەوتنی شنگال واژۆکراوە، بەڵام حکومەتی عێراق ڕێککەوتنەکە جێبەجێ ناکات، پێویستە ڕێککەوتنەکە بچێتە بواری جێبەجێکردنەوە. بەپێی ڕێککەوتنەکەش دەبێت دۆخی ئەمنی و ئیداری و خزمەتگوزاری دەستبەر بکرێت بۆ ئەوەی ئاوارەکان بتوانن بگەڕێنەوە، بەڵام دۆخی ئەمنی لاوازە هیچ کۆنترۆڵێک نییە، خزمەتگوزاریش سفرە.

ئەوەی پێویستە بیزانیت: ڕێککەوتنی شنگال خۆی لە شەش خاڵی سەرەکی دەیبینێتەوە، کە بریتین لە: هەڵبژاردنی قایمقامی نوێ، حكومەتی فیدراڵی ئیدارەی پرسی ئەمنی دەكات، دامەزراندنی 2500 كەس لە خەڵكی شنگال و ئاوارەكانی و دروستكردنی هێزێكی نوێ، كۆتاییهێنان بە پەكەكە و هەموو ئەو گرووپانەی پەیوەندیان پێوەیەتی، هیچ كەسێكی سەر بە پەكەكە نابێت لەو هێزە ئەمنییە نوێیە دابمەزرێت و هەولێر و بەغدا هەماهەنگی بۆ ئاوەدانكردنەوەی شنگال و ئیدارەكردنی بكەن.

زانیاریی زیاتر: سەرباری هەوڵەکانی حکوومەتی هەرێمی کوردستان و بەڵێنەکانی حکوومەتی عێراق بۆ دەرکردنی گرووپ و میلیشیاکان لە شنگال و گەڕانەوەی دانیشتووانەکەی، بەڵام بە گوێرەی زانیارییەکان زیاتر لە 20 هەزار چەکداری گرووپە جیاوازەکان لە شنگال جێگیرکراون، بەرپرسانی کارگێڕی شنگال، دەڵێن: گرووپە چەکدارەکان بوونەتە ئاستەنگ لەبەردەم ئاوەدانکردنەوەی شارەکە و شوێنێک بۆ یەکلاکردنەوەی ناکۆکی و ململانێی گرووپەکان.

باکگراوند: ڕۆژی 13ـی تشرینی دووەمی ساڵی 2015 ھێزەکانی پێشمەرگە بە سەرپەرشتیی سەرۆک بارزانی و بە پاڵپشتی فڕۆکە جەنگییەکانی ھاوپەیمانیی نێودەوڵەتی دژ بە داعش، ئۆپەراسیۆنێکیان بۆ کۆنترۆڵکردنەوەی شنگال دەستپێکرد و لە ماوەی 24 کاتژمێردا، شنگال کۆنترۆڵ کرایەوە.