لەبارەی خەرجکردنی 100 مليۆن دینار بۆ هەر پەرلەمانتارێکی عێراق ڕوونکردنەوە دەدرێت

ئاڤا نیوز

پەرلەمانی عێراق ڕەتیدەکاتەوە 100 مليۆن دینار وەک پاداشتی کۆتایی خزمەت بۆ هەر پەرلەمانتارێک خەرجکرابێت، جەختیش دەکاتەوە کە وەزارەتی دارایی زیاتر لە چوار مانگە هیچ پارەیەکی بۆ مەبەستی خەرجییەکان بە پەرلەمان نەداوە.

وێنە گەورەکە: لەگەڵ نزیکبوونەوەی هەڵبژاردن دەنگۆی جیاواز لەسەر پەرلەمانتاران و لایەنەکان بڵاودەبێتەوە، دواهەمینییان ڕاگەیێنراوێکی گردبوونەوەی نیشتیمانی خانەنشینانی عێراق بوو کە دەڵێت، 100 مليۆن دینار وەک پاداشتی کۆتایی خزمەت بۆ هەر پەرلەمانتارێکی عێراق خەرجکراوە.

ڕاگەیێنراوی فەرمی: ڕاگەیاندنی پەرلەمانی عێراق بڵاویکردەوە، ئەو دەنگۆیە دوورە لە ڕاستییەوە و هیچ بنەمایەکی نییە، زیاتر لەوەش دەچێتە چوارچێوەی بێڕێزیکردن بە پەرلەمان و پەرلەمانتاران و شێواندنی شێوەیان لەبەردەم ڕای گشتی.

ئاماژەی بەوەشکردووە، وەزارەتی دارایی زیاتر لە چوار مانگە هیچ بودجەیەکی بۆ خەرجییەکانی پەرلەمان (جگە لە مووچە) خەرج نەکردووە، لەوانەش پارەی ئەو موڵکانەی کە بۆ پەرلەمانتاران بە کرێ گیراون خەرج نەکردووە.