سەرچاوەیەک لە حکومەتی عێراق: هیچ مەترسییەک لەسەر باڵیۆزخانەی ئەمریکا نییە

ئاڤا نیوز

دوا بەدوای بڕیارەکەی ئەمریکا بۆ کەمکردنەوەی ژمارەی کارمەندانی لە باڵیۆزخانەی وڵاتەکەی لەبەغدا، سەرچاوەیەکی بەرپرس  لە حکومەتی عێراق  ڕوونکردنەوە دەدات.

وێنە گەورەکە: بەهۆی زیادبوونی مەترسییە ئەمنییەکان لە ناوچەکەدا، ئەمریکا بڕیاریداوە ژمارەی کارمەندانی لە بەغدا کەمبکاتەوە، بەپێی ئاژانسی ڕۆیتەرز باڵیۆزخانەی ئەمریکا لە بەغدا ئامادەکاری بۆ چۆڵكردنی باڵەخانەکەیان دەکەن.

زانیاریی بەدەستهاتوو: سەرچاوەیەکی بەرپرس لە حکومەتی عێراق ڕایگەیاند: بڕیارەکەی ئەمریکا بۆ کەمکردنەوەی دیبلۆماسیی بەشێک لە وڵاتانی ڕۆژهەڵاتی ناوەڕاست دەگرێتەوە نەک تەنیا عێراق.

ئەو سەرچاوەیە ئاماژەی بەوەشکرد، لایەنی عێراقی هیچ مەترسییەکی ئەمنیی دەستنیشان نەکردووە تاوەکو پێویست بە کەمکردنەوە یان چۆڵکردنی بالیۆزخانەی ئەمریکا بێت لە بەغدا.

لەلایەکی دیکەوە: تامی برووس، وتەبێژی وەزارەتی دەرەوەی ئەمریکا بە ئاڤا میدیای ڕاگەیاند، "بە پشتبەستن بە دوایین شیکارییەکانمان بڕیارماندا ئەرکەکەمان لە عێراق کەم بکەینەوە".