ئەمریکا بۆ هاووڵاتیانی: گەشت بۆ عێراق مەکەن

ئاڤا نیوز

ئەمریکا بەرزترین ئاستی هۆشداریی گەشتکردنی بۆ عێراق دەرکرد و داوا لە هاووڵاتیانی دەکات بەهیچ شێوەیەک سەردانی ئەو وڵاتە نەکەن.

وێنە گەورەکە: ئیدارەی دۆناڵد ترەمپ، سەرۆکی ئەمریکا پێی وایە دۆخی ئێستای عێراق مەترسیدارە و هەنگاوەکانی بۆ پاراستنی هاووڵاتیان و کارمەندانی لە بەغدا دەستپێکردووە.

ڕاگەیێنراوی فەرمی: وەزارەتی دەرەوەی ئەمریکا ڕایگەیاند، بەهۆی زیادبوونی ئاڵۆزییەکان لە ناوچەکە، ئاستی هۆشدارییان بۆ گەشتکردنی هاووڵاتیانیان بۆ عێراق بەرزکردووەتەوە.

زانیاریی زیاتر: ڕاگەیێنراوەکە دەڵێت، بەهۆی تیرۆر، ڕفاندن، ململانێی چەکداری، نائارامیی مەدەنی و توانای سنوورداری حکومەتی ئەمریکا بۆ پێشکەشکردنی خزمەتگوزاریی فریاگوزاری بە هاووڵاتیانی لە عێراق، گەشت بۆ ئەو وڵاتە مەکەن.

ئەمریکا پێی وایە، هاوڵاتیانی لە عێراق رووبەڕووی مەترسیی گەورە دەبنەوە، لەوانە تووندوتیژی و ڕفاندن، هاوکات هۆشداریش دەدەن لەوەی گرووپە تیرۆریستی و یاخیبووەکان و میلیشیاکانی دژ بە ئەمریکا بەردەوام هێرش دەکەنەسەر هێزە ئەمنییەکان، هاووڵاتیانی مەدەنی، هاووڵاتیانی ئەمریکی و کۆمپانیا نێودەوڵەتییەکان، هێرشەکانیش بە بەکارهێنانی بۆمبی چێندراو، مووشەک و فڕۆکەی بێفڕۆکەوان لە زۆربەی ناوچەکان، بە شارە گەورەکانیشەوە، روودەدەن.