دوای بڕیارەکەی ئەمریکا نرخی نەوت گۆڕانکاری بەسەردا هات

ئاڤا نیوز

بەهۆی ناجێگیری دۆخی ڕۆژهەڵاتی ناوەڕاست، نرخی نەوتی برێنت گەیشتە بەرزترین ئاستی لە دوو مانگی ڕابردوودا.

وێنە گەورەکە: گرژی و ئاڵۆزییەکانی نێوان ئەمریکا و ئێران لەلایەک و ئیسرائیل و ئێران لەلایەکی دیکەوە، کاریگەریی لەسەر بازاڕەکانی نەوت لە جیهان کردووە، بەجۆرێک بەهۆی بڕیاری کەمکردنەوەی ستاف و دیپلۆماتکارانی ئەمریکا لە باڵیۆزخانەکانی عێراق و کوەیت و بەحرەین، نرخی نەوت بەرز بووەوە.

زانیاریی بەدەستهاتوو: ئەمڕۆ لەگەڵ کردنەوەی بازاڕەکاندا، نرخی نەوتی خاوی برێنت بەڕێژەی 30 سەنت کە دەکاتە 0.4% دابەزیوە و گەیشتووەتە 69.47 دۆلار بۆ هەر بەرمیلێک، لەکاتێکدا نەوتی خاوی ئەمریکای ڕۆژئاوای تەکساس 23 سەنت دابەزیوە، کە دەکاتە 0.3% و گەیشتووەتە 67.92 دۆلار.
 
باکگراوند: دوێنێ چوارشەممە، بەهۆی بڕیاری ئەمریکا بۆ کەمکردنەوەی ستافی باڵیۆزخانەکانی لە ڕۆژهەڵاتیی ناوەڕاست نرخی نەوتی برێنت 70 دۆلاری تێپەڕاند و ئەوەش بووە هۆکار بۆ ئەوەی نرخی هەردوو نەوتی برێنت و سووکی تەکساس بەڕێژەی 4% بەرزببنەوە.