سوودانی: پەرەسەندنی گرژییەکان خزمەت بە چارەسەر ناکات

ئاڤا نیوز

سەرۆکوەزیرانی عێراق ڕایدەگەیێنێت، عێراق پشتیوانی لە ڕێبازێکی دادپەروەرانە دەکات بۆ دانوستانەکانی نێوان ئێران و ئەمریکا، پێشیوایە پەرەسەندنەکان خزمەت بە چارەسەر ناکات.

وێنە گەورەکە: سەرەڕای پێشهاتە خێراکانی ناوچەی ڕۆژهەڵاتی ناوەڕاست و بڕیاری ئەمریکا بە چۆڵکردنی بەشێکی باڵیۆزخانەکەی لە عێراق، حکومەتی عێراق جەختی لە پشتیوانیی خۆی بۆ دۆزینەوەی ڕێبازێکی دادپەروەرانە و هاوسەنگ لەنێوان ئێران و ئەمریکا دەکاتەوە.

چیرۆکی سەرەکی: محەممەد شیاع سوودانی، سەرۆکوەزیرانی عێراق لەگەڵ باڵیۆز و سەرۆکی نێردە دیپلۆماسییەکانی وڵاتانی عەرەبی لە عێراق کۆبووەوە.

ڕاگەیێنراوی فەرمی: بەگوێرەی ڕاگەیێنراوی نووسینگەی سەرۆکوەزیرانی عێراق، لە میانی دیدارەکە، سوودانی جەختی لە پشتیوانیی عێراق بۆ دۆزینەوەی ڕێبازێکی دادپەروەرانە و هاوسەنگ لەنێوان ئێران و ئەمریکا کردەوە، بە جۆرێک کە ببێتە هۆی دەرەنجامی ئەرێنی بۆ دانوستانەکانی نێوانیان.

لە هەمان کاتدا: بە گوتەی سوودانی، پەرەسەندنی گرژییەکانیش خزمەت بە چارەسەر ناکات، ناوبراو ئاماژەی بە هەوڵە بەردەوامەکانی عێراق کرد بۆ پاڵپشتی لەو لێکتێگەیشتنانەی کە بەشدارن لە سەقامگیری ناوچەکە.