یەکەم هەڵوێستی فەرمی عێراق لەبارەی کەمکردنەوەی کارمەندانی باڵیۆزخانەی ئەمریکا

ئاڤا نیوز

وتەبێژی فەرماندەی گشتی ‌هێزە چەکدارەکانی عێراق ڕایگەیاند، بڕیاری حکومەتی ئەمریکا بۆ کەمکردنەوەی کارمەندانی باڵیۆزخانەکەی لە بەغدا ڕێکارێکی خۆپارێزییە و دۆخی ئاسایش و ئارامی عێراق تا دێت بەرەو باشتربوون دەچێت، جەختیش دەکاتەوە لەسەر ئەوەی هەموو نێردە دیپلۆماسییەکانی وڵاتانی بیانیی لە عێراق پارێزراون و هیچ هەڕەشەیەکیان لەسەر نییە.

وێنە گەورەکە: لە پێشهاتێکی نوێدا و بەهۆکاری بوونی مەترسی ئەمنیی، دوێنێ ئەمریکا بڕیاریدا ژمارەی کارمەندانی باڵیۆزخانەی وڵاتەکەی لەبەغدا کەمبکاتەوە، حکومەتی عێراقیش ڕایگەیاند، هیچ مەترسییەکی ئەمنیی لە وڵاتدا بوونی نییە تا پێویست بەو بڕیارە بکات.

لێدوانی فەرمی: سەباح نوعمان، وتەبێژی فەرماندەی گشتی ‌هێزە چەکدارەکانی عێراق بۆ ئاژانسی فەرمی هەواڵی عێراقی ڕایگەیاند:

٠ هەموو نێردە دیپلۆماسییەکان لە دۆخێکی پڕ لە ئاسایشدا کارەکانی خۆیان دەکەن، کەمکردنەوەی کارمەندانیش لە باڵیۆزخانەی ئەمریکا لە عێراق و ناوچەکانی دیکەی ڕۆژهەڵاتی ناوەڕاست ڕێکارێکی خۆپارێزیی و ڕێکخستنی تایبەت بە خۆیانە.

٠ بڕیارەکە هیچ پەیوەندییەکی بە بوونی هەڕەشەی ئەمنیی لەسەر خاکی عێراق نییە، بەتایبەتیش کە هەموو ئاماژەکان دەری دەخەن دۆخی ئەمنیی وڵات بەرەو باشتر دەڕوات و هێزە ئەمنییەکانیش بە ئاستێکی بەرزەوە پلانی ئەمنیی جێبەجێ دەکەن.

٠ ڕاپۆرتە هەواڵگرییەکان ئاماژە بە هیچ هەڕەشەیەکی ئەمنیی ناکەن کە کاریگەری لەسەر کاری نێردە دیپلۆماسییەکان و دۆخی وڵات بەگشتی هەبێت، هێزە ئەمنییەکانیش بە وردی چاودێری گۆڕانکارییەکان دەکەن و بۆ هەر ئەگەرێکی نەخوازراو لە ئامادەباشیی تەواودان.

گۆشەیەکی دیکەی دیمەنەکە: دوێنێ ماڵپەڕی ئەلعەینی ئیماراتی لە سەرچاوەیەک لە ئەمیندارییەتی ئەنجوومەنی ئاسایشی نیشتیمانی عێراقەوە بڵاویکردەوە، پڕۆسەی کەمکردنەوەی کارمەندانی ئەمریکا دیپلۆماتکار و هێزە ئەمنییەکان ناگرێتەوە، بەڵکو ئەو فەرمانبەرانەی کۆمپانیاکان دەگرێتەوە کە گرێبەستیان لەگەڵ نێردەی ئەمریکا لە عێراق هەیە، سەرچاوەکە جەختیشیکردووەتەوە کە ئەم هەنگاوە پەیوەندی بە دۆخی ئەمنیی بەغداوە نییە و بوونی سیاسی و ئەمنیی ئەمریکا لە وڵاتەکەدا هیچ گۆڕانکارییەکی بەسەردا نەهاتووە.

کاریگەریی و لێکەوتەکان: ئەمیندارییەتی ئەنجوومەنی ئاسایشی نیشتیمانی عێراقی لە ڕوونکردنەوەیەکدا، دەنگۆی ئەو پێگە ئیماراتییە کە بەناوی ئەوانەوە بڵاویکردووەتەوە لەبارەی ڕێکارەکانی ئەمریکا بۆ کەمکردنەوەی فەرمانبەرانیی و خێزانەکانیان لە عێراق ڕەتدەکاتەوە، داواش لە دەزگاکانی ڕاگەیاندن دەکات لێدوان و زانیاریی تەنیا لە سەرچاوە فەرمییەکانی ئەنجوومەنی ئاسایشی وڵاتەوە وەربگرن.