دەیان كۆچبەری كورد لە دوورگەیەكی یۆنان بێ نان و ئاو گیریان خواردووە

ئاڤا نیوز

 

دەیان کۆچبەری کورد، زیاتر لە بیست و چوار کاتژمێرە، لە دوورگەیەکی سەر بە یۆنان گیریان خواردووە و نان و ئاویان لێ بڕاوە، لە نێویشیاندا ژن و منداڵ هەن.

 

چیرۆکی سەرەکی: ژمارەیەک کۆچبەری کورد کە لە تورکیاوە بەڕێکەوتوون، لە دوورگەی (سمییە-Symi) سەر بە وڵاتی یۆنان گیریان خواردووە و داوای هاوکاری و بەدەنگەوەچوون دەکەن.

 

زانیاریی بەدەستهاتوو: کۆچبەرە کوردەکان پەیوەندییان بە کەسوکاریان و ژمارەیەک چالاکوانی مافی پەنابەران لە ئەوروپا کردووە و پێیان ڕاگەیاندوون، دوای تێپەڕبوونی شەو و ڕۆژێک بەسەر مانەوەیان لە دوورگەکە، تاکو ئێستا هیچ کەس و لایەنێک بە هانایانەوە نەچووە.

 

لێدوانی فەرمی: ڕەنج پشدەری، تایبەت بە ئاڤا ڕایگەیاند، بەپێی وتەی کۆچبەرەکان ژمارەیان 30 کەسە و لەنێویاندا ژن و منداڵ هەن، بەهۆی زۆر مانەوەیان لە دوورگەکە، نان و ئاویان لەلا نەماوە و داوای یارمەتی و بەدەنگەوەهاتن دەکەن.

 

ئەوەی پێویستە بیزانیت: ئاڤا دەنگی ئەو کۆچبەرانەی کە گیریان خواردووە، گەیاندە حکومەتی هەرێمی کوردستان و سەرچاوەیەک لە فەرمانگەی پەیوەندییەکانی دەرەوە بەڵێنی دا بەدواداچوونی جددی بۆ وردەکاری بابەتەکە دەکەن و لەئەگەری دڵنیابوونەوە لە ڕاستی و دروستی کێشەکە لەڕێگەی نوێنەرایەتی حکومەتی هەرێمی کوردستان لە وڵاتێکی دیکەی ئەوروپاوە، بەدواداچوون بۆ کێشەی ئەو هاووڵاتیانە دەکەن.