سەرۆکوەزیران مەسرور بارزانی بەشداریی پرسەی كەریم شنگالی دەكات

ئاڤا نیوز

 

مەسرور بارزانی لە هەولێر بەشداریی پرسەی كەریم شنگالی، كەسایەتیی دیاری سیاسیی هەرێمی كوردستان دەكات و بنەماڵەی خوالێخۆشبوو، پێزانینی خۆیان بۆ هاوخەمی و ئامادەبوونی لە پرسەكە دەردەبڕن.

 

وێنە گەورەكە: ئێوارەی ڕۆژی سێشەممە 10-6-2025 کەریم شنگالی، ئەندامی پێشووی مەکتەبی سیاسیی پارتی و  وەزیری پێشووی ناوخۆی هەرێمی کوردستان بە نەخۆشی کۆچی دوایی کرد.

 

چیرۆكی سەرەكی: پاشنیوەڕۆی ئەمڕۆ پێنجشەممە 12-6-2025، مەسرور بارزانی، سەرۆکی حکومەتی هەرێمی کوردستان، لە شاری هەولێر، بەشداری لە پرسەی کەریم شنگالی، وەزیری پێشووی ناوخۆی هەرێمی کوردستان و سەرکردەی دیاری پارتی دیموکراتی کوردستان کرد.

 

ڕاگەیێنراوی فەرمی: ماڵپەڕی فەرمی حكومەتی هەرێمی كوردستان بڵاوی كردووەتەوە، سەرۆکوەزیران سەرەخۆشی و هاوخەميی خۆی بە بنەماڵە و کەسوکاری خوالێخۆشبوو گەیاند و هیوای خواست، خوای مەزن گیانی بە بەهەشت شاد بکات و ئارامی و دڵنەواییش بە بنەماڵە و کەسوکار و هەڤاڵانی ببەخشێت.

 

زانیاریی زیاتر: بنەماڵەی کەریم شنگالی سوپاس و پێزانینی خۆیان بۆ هاوخەمی و ئامادەبوونی سەرۆکی حکومەت لە پرسەکە دەربڕی.

 

باكگراوند: كەریم شنگالی، ناوی تەواوی عه‌بدولكه‌ریم سوڵتان عه‌بدوڵڵایە، یاساناس و سیاسەتمەدار بوو، لە ساڵی 1950 لە شاری مووسڵ لەدایک بووە‌. ساڵی 1971 به‌كالۆریۆسی له‌ به‌شی یاسا له‌ كۆلێژی یاسا و ڕامیاریی زانكۆی به‌غدا وه‌رگرتووه‌‌‌، ساڵانی (1971-1973) له‌ شاری به‌غدا به‌ پیشه‌ی پارێزه‌رییه‌وه‌ سەرقاڵ بووه‌، ساڵی 1975 له‌ دوای نسكۆی شۆڕشی ئەیلوول وه‌ك په‌نابه‌ر ڕووی كردووه‌ته‌‌ و‌ڵاتی ئێران و بووەتە ئه‌ندامی لێژنه‌ی سه‌رپه‌رشتی ئاواره‌كانی باشووری كوردستان له‌ وڵاتی ئێران.

- ساڵی 1968 په‌یوه‌ندی به‌ ڕیزه‌كانی پارتییه‌وه‌ كردووه‌، ساڵانی (1993-1994) به‌ڕێوه‌به‌ری ئاسایشی گشتیی حكومه‌تی هه‌رێمی كوردستان بووه‌.

- ساڵی 1999 لە کۆنگرەی دوازدەیەمی پارتی، بە ئه‌ندامی كۆمیته‌ی ناوه‌ندیی پارتی دیموكراتی كوردستان هه‌ڵبژێردراوه‌، له‌ ساڵه‌كانی 2001، 2006، 2009، 2012 و 2014 و له‌ كابینه‌كانی چواره‌م، پێنجه‌م، شه‌شه‌م، حه‌وته‌م و هه‌شته‌م به‌ وه‌زیری ناوخۆی حكومه‌تی هه‌رێمی كوردستان هه‌ڵبژێردراوه‌.

- ساڵی 2010 لە كۆنگره‌ی سێزده‌یه‌‌می پارتی به‌ ئه‌ندامی ئه‌نجوومه‌نی سه‌ركردایه‌تی و دواتر مه‌كته‌بی سیاسی پارتی دیموكراتی كوردستان هه‌ڵبژێردراوه، دوای دامه‌زراندنی كابینه‌ی نۆیه‌می حكومه‌تی هه‌رێم به‌ ڕاوێژكار له‌ سه‌رۆكایه‌تیی هه‌رێمی كوردستان ده‌ستنیشان كرا.