بەهۆی گرژییەکان ژمارەیەک گەشتیاری هەرێمی کوردستان لە دوورگەی کیش گیریان خواردووە

ئاڤا نیوز

 

ژمارەیەک گەشتیاری هەرێمی کوردستان لە جەزیرەی کیشی باشووری ئێران گیریان خواردووە، ئەمەش بەهۆی هەڵکشانی گرژییە سەربازییەکانی ناوچەکە و وەستانی گەشتە ئاسمانییەکانی ئێران.

 

چیرۆکی سەرەکی: بەرەبەیانی ئەمڕۆ، ئیسرائییل هێرشێکی فراوانی مووشەکی و درۆنی بۆ سەر ئێران ئەنجامدا و دەیان شوێنی ستراتیژی و کەسایەتی سەربازی و زانای ئەتۆمی بەئامانج گرت، بەهۆیەوە دۆخی ئەو وڵاتە نائاسایی بووە و سەرجەم گەشتە ئاسمانیە ناوخۆیی و نێودەوڵەتییەکانی وەستاندووە.

 

زانیاریی بەدەستهاتوو: سەرچاوەیەک لە کۆمپانیای گەشتیاریی زەمالە تایبەت بە ئاڤا ڕایگەیاند، ئەو گەشتیارانەمان کە ئێستا لە جەزیرەی کیش'ـن، تاوەکو فرۆکەخانەکان دەکرێنەوە و دۆخەکە ئاسایی دەبێتەوە، لە هۆتێلەکانی خۆیان دەمێننەوە و میوانی ئێمەن تا گەڕانەوەیان.

 

ئەوەی پێویستە بیزانیت: کۆمپانیاکە ئێستا 140 گەشتیاری هەرێمی کوردستانی بردووەتە ئێران کە 60 لەو گەشتیارانە لە دوورگەی کیشن و 80ی دیکەش لە ناوچە گەشتیارییەکانی 'شیمالی ئێرانن" کە هەوڵدەدرێت ئەمشەو لە ڕێگەی وشکانییەوە بگەڕێندرێنەوە.