ڕۆژنامەی ئۆرشەلیم پۆست وردەکاری ئۆپەراسیۆنەکانی ئیسرائیل بۆ سەر ئێران ئاشکرا دەکات

ئاڤا نیوز

پێش دەستپێکردنی هێرشەکانی ئیسرائیل بۆ سەر ئێران ئەو وڵاتە لە ڕێگەی ڕاگەیاندنەکانییەوە تارانی هەڵخەڵەتاندووە.

چیرۆکی سەرەکی: ئیسرائیل لەڕێگەی میدیاکانەوە ئێرانی بە هەڵەدا برد و بە تووندی هێرشی کردە سەر پێگە ئەتۆمی و بنکە سەربازییەکانی ئەو وڵاتە.

زانیاریی بەدەستهاتوو: بە گوێرەی ڕۆژنامەی ئۆرشەلیم پۆستی ئیسرائیلی، لە شەوی هێرشەکەدا ئیسرائیل وایکردووە دۆخەکە زۆر ئارام دەربکەوێت، لەکاتێکدا لەسەر ئاستی نێودەوڵەتی چاوەکان لەسەر گەڕێکی دیکەی دانوستانە ئەتۆمییەکان بوون، ڕاگەیاندنەکانیش وایان بڵاوکردەوە، بنیامین نەتەنیاهۆ سەرۆکوەزیرانی ئیسرائیل لە پشوودایە و ئاهەنگی هاوسەرگیری کوڕەکەی بەڕێوەدەچێت، ئەمەش وایکرد ئۆپەراسیۆنەکەیان دژ بە ئێران زۆر نهێنی بێت و بتوانن ئێران هەڵبخەڵەتێنن.

زانیاریی زیاتر: ڕۆژنامەکە ئەوەشی خستووەتەڕوو، لە پشت دەرگا داخراوەکانەوە ئەنجوومەنی ئاسایشی ئیسرائیل بڕیاریدا لە ناوجەرگەی ئێران بدرێت.

ئیسرائیل بۆئەوەی تاران زیاتر بە هەڵە ببات لە میدیاکانییەوە ڕایگەیاند، کۆبوونەوەی ئەنجومەنی ئاسایشی ئیسرائیل تایبەت دەبێت بە گفتوگۆکردن لەسەر دانوستانەکان سەبارەت بە ڕزگارکردنی بارمتەکان و ئیسرائیل ئەوەشی بڵاوکردبووەوە، پێش گەڕێکی دیکەی دانوستانەکانی ئەمریکا و ئێران شاندێکیان دەنێرنە واشنتن.

ئەوەی پێویستە بیزانیت: ئەم بانگەشە میدیاییەی ئیسرائیل ئامانجی لێی بۆ ئەوە بووە تاران تووشی شۆک بکەن و نەتوانێت کتوپڕ وەڵامی هێرشەکان بداتەوە.