لە ساڵێکدا لە سنووری هەولێر 72 هەزار بوتڵ خوێن بەخشراوە

ئاڤا نیوز

لە ڕۆژی جیهانی خوێن بەخشیندا، بەڕێوەبەرایەتیی گشتیی تەندروستیی پارێزگای هەولێر، ئاماری خوێن بەخشینی تەواوی ساڵێك ڕادەگەیەنێت کە 72 هەزار بوتڵی خوێنە.

چیرۆكی سەرەكی: ڕۆژی 14ـی 6ـی هەموو ساڵێك بە ڕۆژی جیهانیی خوێن بەخشین دەستنیشان كراوە و ساڵانە لەهەمان کاتدا هەڵمەتێکی گەورەی خوێن بەخشین لە هەرێمی کوردستان بەڕێوە دەچێت. 

لێدوانی فەرمی: د. دلۆڤان محەممەد، بەڕێوەبەری گشتیی تەندروستیی هەولێر بە ئاڤا نیوزی ڕاگەیاند: لە ساڵی 2024 نزیكەی 72 هەزار بوتڵی خوێن لە سنووری پارێزگای هەولێر بەخشراوە، لەم ڕووەوە بە پێویستی دەزانین دەستخۆشی لە كۆمەڵی خوێنبەخشان بكەین كە بەردەوام لەسەر هێڵن لەگەڵ بەڕێوەبەرایەتیی بانكی خوێن بۆ دابینكردنی خوێنی پێویست بۆ ئەو نەخۆشانەی كە پێویستیان دەبێت.

زانیاریی زیاتر: لە بەڕێوەبەرایەتیی بانكی خوێن، بوتڵی خوێن بۆ سەرجەم نەخۆشخانە حكومی و ناحكومییەكان ئامادە دەكرێت، هەر خوێنێك كە وەردەگیرێت سەرجەم پشكنینە پێویستەكانی بۆ دەكرێت، بۆ ئەوەی لێی دڵنیا ببنەوە ئینجا بیدەن بەو نەخۆشانەی كە پێویستیان پێیەتی، بەپێی گوتەی بەڕێوەبەری گشتیی تەندروستیی هەولێر، لە كاتی وەرگرتنی خوێنەكە و دواتریش لە كاتی پێدانی خوێنەكە بە نەخۆشەكە پشكنین بۆ خوێنەكە دەكرێت بەمەبەستی دڵنیابوونەوە لە سەلامەتیی خوێنەكە.