ژمارەیەک وانەبێژی لادراو بەپێی پێویستی پەروەردەکان دەگەڕێندرێنەوە

ئاڤا نیوز

77 مامۆستای وانەبێژی لادراو، دووبارە گەڕێندرانەوە سەر کارەکانیان کە سەر بە پەروەردەکانی شێخان، شنگال، شەقڵاوە، ڕانیە، پشدەر، کەلارن، سەرچاوەیەکیش لە دیوانی وەزارەتی پەروەردە تایبەت بە ئاڤا ئاشکرای دەکات، مانگی هەشتیش فەرمانێکی دیکە کارگێڕی بۆ لەجێدانانی مامۆستایانی وانەبێژ دەربچێت، بەمەبەستی پڕکردنەوەی میلاکی ساڵی نوێی خوێندن.

 

وێنە گەورەکە: لە مانگی ئەیلوولی ساڵی ڕابردوو، بە فەرمانی سەرۆکوەزیران مەسرور بارزانی، نزیکەی 39 هەزار وانەبێژ کرانە مامۆستای گرێبەست، دواتر بەپێی ڕێنمایی وەزارەتی پەروەردە، هەر مامۆستایێکی گرێبەست کارەکەی جێبهێڵێت یاخود بە هەر هۆکارێکی دیکە دووربخرێتەوە، ئەوا وانەبێژانی دوورخراوە شایستەترن بۆ ئەوەی لە شوێنەکانیان دابنرێن، بە لەبەرچاوگرتنی ساڵانی خزمەتی وانەبێژەکە، پسپۆڕییەکەی و پێویستی پەروەردەکان.

 

زانیاریی بەدەستهاتوو: سەرچاوەیەک لە وەزارەتی پەروەردە تایبەت بە ئاڤا ڕایگەیاند، لیژنەیەکی دیوانی وەزارەتی پەروەردە، هەڵسەنگاندن دەکات بۆ دیاریکردنی شایستەیی لەجێدانانی وانەبێژان لە شوێنی مامۆستایانی گرێبەست، پاڵپشت بە ڕێنمایی وەزارەتی پەروەردە.

ئەو سەرچاوەیە ڕوونیشی کردەوە، هەموو ئەوانەی کە فەرمانی کارگێڕیی وانەبێژییان لە وەزارەتی پەروەردە هەیە، کە دواتر بەهۆی زۆری میلاک کراون بە وانەبێژی لادراو، سیڤی و فەرمانی کارگێڕییان لەلای ئێمە هەیە، دواتر لە دووبارە دانانیان، ساڵانی خزمەت و پسپۆڕی وانەبێژەکە لەبەرچاودەگیرێت کە کامەیان زیاتر شایستەن. بەپێی پێویستی پەروەردەکان و پرۆسەکەش بەردەوامە.

 

زانیاریی تایبەت: لەسەر داواکاری بەشێک لە پەروەردەکان 77 وانەبێژی لادراو گەڕێندراونەتەوە، ڕەنگە مانگی هەشتیش فەرمانێکی دیکەی لەجێدانانی مامۆستایانی وانەبێژ دەربچێت بەمەبەستی پڕکردنەوەی میلاکی ساڵی نوێی خوێندنی 2025-2026.