کەمتر لە 24 کاتژمێر سێ ڕووداوی خنکان ڕوویان داوە

ئاڤا نیوز

لە ماوەی کەمتر لە 24 کاتژمێر سێ ڕووداوی خنکان ڕوویانداوە و تەرمی دوو لە خنکاوەکانیش دۆزراونەتەوە.

وێنە گەورەکە: ساڵانە لەگەڵ بەرزبوونەوەی پلەی گەرمی ژمارەیەکی زۆری خەڵک بۆ سەیران و خۆفێنک کردنەوە ڕوو لە ڕووبار و بەنداوەکان دەکەن ، بەڵام بەهۆی نەشیاوی رووبار بەنداوەکانی هەرێمی کوردستان بۆ مەلەوانی و هەندێ جاریش بەهۆی سەرکێشی هاونیشتمانییان لەکاتی مەلەوانی ڕووداوی خنکانی لێدەکەوێتەوە.

لێدوانی فەرمی: مقەدەم سەرکەوت کاڕەش، گوتەبێژی بەڕێوەبەرایەتیی گشتیی بەرگریی شارستانیی هەرێمی کوردستان بە ئاڤای گوت: لەماوەی کەمتر لە 24 کاتژمێر سێ ڕووداوی خنکان ڕوویانداوە، تەرمی دوو کەسیان دۆزراوەنەتەوە و گەڕانی تیمەکانی ژێر ئاو بە دوای تەرمی سێیەم بەردەوامە.

زانیاریی زیاتر: سێ ڕووداوەکەی خنکان:   

- خنکانی گەنجێکی تەمەن 20 ساڵ لە زێی گەورە لە قەزای خەبات، بە ناوی عومەر تەڵعەت کە تا ئێستا تەرمەکەی نەدۆزراوەتەوە.

- خنکانی گەنجێکی تەمەن 20 ساڵ لە زێی گەورە بە ناوی موهەنەد ئیسماعیل، لە ماوەی نیو کاتژمێر تەرمەکەی لەلایەن تیمەکانی ژێرئاوی بەرگریی شارستانیی ئاکرێ دەرهێنرا.

- ⁠خنکانی منداڵێک تەمەن پێنج ساڵ لە سنووری قەزای چۆمان بە ناوی محەممەد سیروان، بە کەمتر لە 20 خولەک تەرمەکەی لە لایەن ژێرئاوی بەڕێوەبەرایەتیی بەرگریی شارستانیی سۆران دەرهێنرا.

ئەوە پێویستە بیزانیت: بەگوتەی مقەدەم سەرکەوت کاڕەش، مەلەکردن لە ئاوەکانی هەرێمی کوردستان بە هیچ شێوەیەک شیاو نیە، چونکە ئاوەکان سارد و تیژڕەون و قووڵییان دیار نیە.