حاجیانی ئێران بە کاتی بۆ عێراق دەگوازرێنەوە و جێگیر دەکرێن

ئاڤا نیوز

 

دامەزراوەی حەج و زیارەتی ئێران ڕایگەیاند، لە ئەمڕۆ یەکشەممەوە لە ڕێگەی بەرنامەی هاوبەشی (ئاسمانی-وشکانی)یەوە حاجیانی وڵاتەکەیان لە ڕێگەی وشکانی، لە سعودییەوە بۆ عێراق دەگوازرێنەوە و بەکاتی لە نەجەف و کەربەلا جێگیر دەکرێن.

 
وێنە گەورەکە: شەڕی نێوان ئێران و ئیسرائیل گرفتی بۆ ئەو هەزاران حاجیەیەی وڵاتانی ناوچەکە دروستکردووە کە ئێستا لە سعودیەن و دوای بەجێهێنانی فەریزەی حەج بەنیازن بۆ وڵاتەکانی خۆیان بگەڕێننەوە.

 

ڕاگەیێنراوی فەرمی: دامەزراوەی حەج و زیارەتی ئێران لە ڕاگەیێنراوێکدا ئاماژەی بەوەشكردووە، حاجیانی وڵاتەکەیان لە مەدینە بەڕێگەی ئاسمانی بۆ فڕۆکەخانەی عەرعەر لە سنووری عێراق و سعودیە دەگوازرێنەوە، دواتریش بەڕێگەی وشکانی بۆ شارەکانی نەجەف و کەربەلا دەگوازرێنەوە و لەوێ بەکاتی دەمێننەوە، لەو ماوەیەدا زیارەتی شوێنە ئاینییەکان دەکەن.

 

ئەوەشی خستووەتەڕوو، دواتر حاجیانی ئێران بەپاس بۆ سنووری ئێران دەگوازرێننەوە و بۆ پارێزگاکانی خۆیان دەگەڕێنرێنەوە.