کێڵگەیەکی غازی بەسرە بەهۆی مەترسی ئەمنییەوە چۆڵ دەکرێت

ئاڤا نیوز

 

بەهۆی مەترسیی ئەمنییەوە، ڕۆژی شەممە، سەرجەم کرێکارانی بیانی کێڵگەی غازی سیبە لە باشووری شاری بەسرە کارەکانیان جێدەهێڵن و کارکردن لەو دامەزراوەیە ڕاگیراوە.

 

وێنە گەورەکە: کێڵگەی "سیبە" بە بەردی بناغەی کەمکردنەوەی پشتبەستنی عێراق بە غازی هاوردە دادەنرێت، لە کاتێکی گرنگی هاویندا کارەکانی بە تەواوی ڕاگیرا کە لەم ماوەیەدا خواست لەسەر غاز و کارەبای نیشتیمانی زیاد دەکات.

 

لێدوانی فەرمی: ڕۆژی شەممە، سەرچاوەیەکی ئەمنی بە ئاڤا میدیای ڕاگەیاند: کێڵگەی غازی سیبە لە باشووری پارێزگای بەسرە بە تەواوی ڕاگیراوە و 600 کرێکاری بیانی کە 100یان شارەزا و تەکنیکاران کێڵگەکەیان جێهێشت، ئەوەش دوای ئەوەی مووشەکی ئێرانی بەرەو ئیسرائیل بەسەر کێڵگەکە تێپەڕیوە.

 

-سەرچاوەکە دەشڵێت: ئەو کۆمپانیایانەی کە لە کێڵگەکە کار دەکەن وەکو؛  "کوێت ئینێرجی" کە تیمەکانی چینی و پاکستانی لەخۆدەگرێت، لەگەڵ کۆمپانیای "باتوو"ی تورکی، بەپەلە کارەکانیان ڕاگرت و کێڵگەکەیان چۆڵکرد.

 

کاریگەری و لێکەوتەکان: ڕێژەی کرێکارانی عێراقی لەو کێڵگەیە 25٪ تێپەڕ ناکات، بەم پێیەش بێت کارێکارانی خۆماڵی ناتوانن شوێنی کرێکار و شارەزایانی بیانی پڕ بکەنەوە و بەرهەمهێنانی غاز تا کاتێكی نادیار ڕادەگیرێت و ئەمەش کاریگەریی ڕاستەوخۆ لەسەر دابین کردنی غاز و کارەبا لە عێراقدا دەکات.