ئێران مەرجەکانی بۆ ڕاگرتنی هێرشەکان ئاشکرا دەکات

ئاڤا نیوز

 

وەزیری دەرەوەی ئێران مەرجەکانی خۆی بۆ ڕاگرتنی هێرشە مووشەکییەکانی بۆ سەر ئیسرائیل ڕادەگەیێنێت.

 

وێنە گەورەکە: تا دێت دۆخی ناوچەکە بەهۆی هەڕەشە و هێرشەکانی ئیسرائیل و ئێران زیاتر دەبێت و هەردوولا بەردەوامن لە هێرشە مووشەکییەکانیان بۆ سەر یەکتری و بەهۆیەوە دەیان هاووڵاتی سڤیل لە هەردوو وڵات کوژراون.

 

لێدوانی فەرمی: عەباس عێراقچی، وەزیری دەرەوەی ئێران مەرجەکانی بۆ ڕاگرتنی هێرشەکانی بۆ سەر ئیسرائیل ئاشکرا کرد و ڕایگەیاند: هێرشە مووشەکییەکانمان بۆ سەر تەلئەڤیڤ ئەو کاتە ڕادەگرین کە ئیسرائیل هێرشەکانی ڕابگرێت کە لە هەینییەوە دەستیپێکردووە.

-عێراقچی گوتیشی، ئێمە بەرگری لە خۆمان دەکەین، بەرگریکردنیش مافی ڕەوای خۆمانە، هاوکات وەزیری دەرەوەی ئێران ڕەخنەی لە ئەنجوومەنی ئاسایشی نەتەوە یەکگرتووەکان گرت و بە "بێباکی" لە بەرامبەر هێرشەکانی ئیسرائیل بۆ سەر وڵاتەکەی تۆمەتبار کرد.