حکومەتی عێراق گرووپە چەکدارەکان پابەندی ڕاگرتنی شەڕ دەکات

ئاڤا نیوز

 

سەرۆکوەزیرانی عێراق لەگەڵ سەرکردەی گرووپە چەکدارەکان پەیوەندی ئەنجامداوە و داوای لێکردوون بەهیچ شێوەیەک نەبنە بەشێک لە شەڕی نێوان ئێران و ئیسرائیل، هەردوولاش جەختیانکردووەتەوە لەوەی ئەو شەڕە "پەیوەندی" بە بەغداوە نییە.

چیرۆکی سەرەکی: دوێنێ بەرپرسێکی باڵای عێراق ڕایگەیاند، حکومەتی وڵاتەکەی بە فەرمی داوای لە ئێران کردووە لە چوارچێوەی گرژییە سەربازییەکانی نێوان تاران و تەلئەڤیڤ، بەهیچ شێوەیەک بەرژەوەندییەکانی ئەمریکا لە وڵاتەکەیدا نەکاتە ئامانج، تارانیش بەڵێنی داوە گرژییەکان بۆ خاکی عێراق نەگوازێتەوە.

 

زانیاریی بەدەستهاتوو: ڕۆژنامەی شەرق ئەلئەوست لە چەند سەرچاوەیەکەوە بڵاویکردەوە، حکومەت و گرووپە چەکدارەکان گەیشتوونەتە بڕیارێکی هاوبەش بۆ بەدوورگرتنی عێراق لە کاریگەرییەکانی شەڕی نێوان ئێران و ئیسرائیل، ئەویش دوای پەیوەندییە بەردەوامەکانی نێوان محەممەد شیاع سوودانی، سەرۆکوەزیران و سەرکردەی گرووپە چەکدارەکان، بڕیارەکەش ئەوەیە "ئێمە پەیوەندییمان بە بەشداریکردن لەم شەڕەدا نییە".

 

لەلایەکی دیکەوە: وتەبێژێکیش بەناوی کەتائیبی سەیدولشوهەدا ئاماژەی بەوەکردووە، ئەو توانایەی لەبەردەست گرووپە چەکدارەکانە لە هاوکێشەی شەڕی نێوان ئێران و ئیسرائیل هیچ کاریگەرییەکی نییە، بەتایبەتیش کە لەم شەڕەدا موشەک و تەکنەلۆژیای پێشکەوتوو و کوشندە بەکاردەهێنرێت.