لە بازگەکانی عێراق ڕێگری لە بەرهەمی ناوخۆی جووتیارانی بەردەڕەش دەکرێت

ئاڤا نیوز

سەرەڕای ڕێککەوتنی نێوان وەزارەتی کشتوکاڵی عێراق و هەرێمی کوردستان لە ئاڵوگۆڕکردنی بەرهەمەکان لەنێوانیاندا، بەڵام لە بازگەیەکی سوپای عێراق ناهێڵن جووتیارانی بەردەڕەش بەرهەمە ناوخۆییەکانیان ڕەوانەی مووسڵ بکەن.

 

چیرۆکی سەرەکی: ژمارەیەک جووتیاری سنووری بەردەڕەش پەیوەندییان بە ئاڤا کردووە، دەمانەوێت شووتی و کاڵەک کە بەرهەمی خۆمانە لە بازگەی سوپای عێراق لە بازگەی مەندان دەمانگەڕێننەوە، دەڵین ناتوانن لێرەوە بارەکە ببەنە مووسڵ بگەڕێنەوە.

 

ئەوەی پێویستە بیزانیت: بە گەڕاندنەوەی بەرهەمەکان و ڕێگریکردن لێیان ئەرکێکی زۆر دەکەوێتە سەر جووتیاران، ناچاران 103 کیلۆمەتری دیکە لە بەردەڕەشەوە بەرەو ناحیەی فایدێ ببڕن بۆ ئەوەی بەرهەمەکانیان بگەیێنن بە مووسڵ.

 

لێدوانی فەرمی: بڕوا فاروق، قایمەقامی بەردەڕەش؛ بە ئاڤای گوت، "ئەم ڕێگرییە بۆ ئەوە دەگەڕێتەوە کە بە فەرمانی سەرۆکوەزیرانی عێراق دەبێت هەموو بەرهەمەکان بگەڕێننەوە بازگەی سەددە بۆ ئەوەی لەوێ بیپشکننەوە ئینجا داخڵی مووسڵ بێت."

لەلایەکی دیکەوە: شوکری جەمیل؛ سەرۆکی ژووری بازرگانی و پیشەسازیی دهۆک بە ئاڤای ڕاگەیاند، "لەسەر هێڵ دەبین بۆ چارەسەری کێشەکە، چونکە زوڵمێکە لە جووتیارانی ناوچەکە دەکرێت و دەیان کیلۆمەتر ڕێگەیان بەڕوودا درێژ دەکرێتەوە."