ڕێکخراوی هەنگاو: لە شەڕی سێ ڕۆژەی ئیسرائیل و ئێران زیاتر لە 300 سەربازی ئێران کوژراون

ئاڤا نیوز

ڕێکخراوی مافی مرۆڤی هەنگاو ڕایگەیاندووە، بەهۆی بۆردومانە بەردەوامەکانی ئیسرائیل بۆ سەر ئێران زیاتر لە 300 سەربازی سوپای ئێران کوژراون.

 

وێنە گەورەکە: شەڕی سێ ڕۆژەی نێوان ئێران و ئیسرائیل بەردەوامی هەیە. هێشتا ئێران هیچ ئامارێکی فەرمی لەبارەی کوژرانی سەرباز و هاووڵاتییانی مەدەنی بڵاونەکردوەتەوە، بەڵام لەبارەی کوژرانی فەرماندە باڵاکانی ژمارەکان زیاد دەکەن و ئامارەکان ئاشکرا دەکرێن.

 

ڕاگەیێنراوی فەرمی: ئەرسەلان یار ئەحمەدی، سەرۆکی ڕێکخراوی مافی مرۆڤی هەنگاو بە ئاڤا میدیای ڕاگەیاند، ناوی 95 هاووڵاتی کوژراو لە ئێران تۆمار کراون و زیاتر لە 300 سەربازیش کوژراوە.

سەرۆکی ڕێکخراوی مافی مرۆڤی هەنگاو ئەوەش دەڵێت: لە ناوچەی "شەهید چەمران"ـی تاران ئەو شوێنەی فەرماندە باڵاکانی ئێران لێی دەمانەوە، لە شەوی یەکەمی بۆردوومانەکانی ئیسرائیل 23 کەس لە ژن و منداڵی فەرماندە سەربازییەکانی ئێران کوژراون و ناویان تۆمار کراوە.

زانیاریی زیاتر: ئەرسەلان یار ئەحمەدی ئەوەش دەڵێت: کارمەندێکی مانگی سوور لە تەورێز و هاووڵاتییەکی کورد بەناوی فەرامەرز حەزرەتی لە قەسری شیرین و کارمەندێکی ڕادیۆ لە هەمەدان لەناو ئاماری کوژراوانن.

بە تەنیشت ئەم بابەتەوە: ڕێکخراوی مافی مرۆڤی هەنگاو دەڵێت، ئەمڕۆ یەکشەممە سوپای پاسداران لە ناوچەی پیشەسازی دێزڵاوای کرماشان بە خەڵکی کاسبکاری ناوچەکەیان وتووە پێویستە ئەم ناوچەیە چۆڵ بکەن و تا کاتێکی نادیار کەس ناتوانێت بگەڕێتەوە.