ئەمشەو 170 حاجی دیكە دەگەنەوە خاكی هەرێمی كوردستان

ئاڤا نیوز

ئەمڕۆ كاروانێكی دیكەی حاجیان كە ژمارەیان 170 هاووڵاتییە، لە شاری مەددینە بەڕێكران و هەر ئەمشەو دەگەنەوە خاكی كوردستان، پرۆسەی گەڕاندنەوەی سەرجەم حاجیانیش لەڕێگەی وشكانی بەردەوام دەبێت.

چیرۆکی سەرەکی: جەنگ و پێشهاتەكانی ناوچەكە لە سەروبەندی گەڕانەوەی حاجیانی كوردستان و عێراق بوو لە خاكی سعوودیەوە، كە زۆرێك لە وڵاتانی ناوچەكە ئاسمانی خۆیان بەڕووی گەشتەكان داخستووە، لەپێناو پاراستنی سەلامەتیی هاووڵاتیانی هەرێمی كوردستان و بەهاناچوونیانەوە، هەرزوو سەرۆكوەزیران مەسرور بارزانی، هاتە سەر خەت و لەڕێگەی وەزارەتی ئەوقاف و كاروباری ئایینی و دەستەی گشتیی حەج و عومرەی عێراق، بڕیاردرا بە دابینكردنی پاس بۆ سەرجەم حاجیان لەپێناو گەڕاندنەوەیان بەڕێگەی وشكانی.

 

لێدوانی فەرمی: كاروان ستونی، وتەبێژی حەج و عومرەی كوردستان بە ئاڤای ڕاگەیاند، ئەو حاجیيانەی کە بە ڕێگەی وشکانی گەشتی سعودیيەیان کردبوو، ژمارەیان هه‌زار و 646 كه‌س بوو، ڕۆژی شه‌ممه‌ 14ـی حوزه‌يران، بەبێ گرفت گەڕانەوە خاکی کوردستان.

- ئێستا دەستكراوە بە گەڕاندنەوەی ئەو حاجیانەی كە بە فرۆكە گەشتیان كردبوو، بەگوێرەی خشتەیەكی ڕۆژانە كە ئامانجەكە ئەوەیە لە نزیكترین كاتدا سەرجەم حاجیان بە سەلامەتی بگەڕێندرێنەوە خاكی كوردستان.

 

ئەوەی پێویستە بیزانیت: بەمەبەستی بەجێهێنانی فەریزەی حەجی ئەمساڵ، پێنج هەزار و 136 کەس لە هەرێمی کوردستانەوە ڕوویان لە وڵاتی سعودییە کردووە کە هەزار و 646 کەسیان لە ڕێگەی وشکانییەوە گەشتیان کردووە و سێ هەزار و 490 کەسی دیکەش لە ڕێگەی ئاسمانی گەشتەکەیان کردووە.