فۆرمێکی وەرگرتنی زانیاری ڕادەگەیێنرێت بۆ ئەو گەشتیارانەی لە وڵاتان گیریان خواردووە

ئاڤا نیوز

وەزارەتی ناوخۆ و فەرمانگەی پەیوەندییەکانی دەرەوەی حکومەتی هەرێمی کوردستان، فۆرمێکی تایبەت بە وەرگرتنی زانیاری بۆ زیاتر کارئاسانیی هاونیشتمانیان کە لە فڕۆکەخانەکانی وڵاتان گیریان خواردووە ڕادەگەیێنن.

وێنە گەورەکە: بەهۆی گرژییەکانی نێوان ئێران و ئیسرائیل فرۆکەخانەکان لە بەشێکی وڵاتان داخران، ژمارەیەکی زۆری هاونیشتمانیانی هەرێمی کوردستان لەو فڕۆکەخانانە گیریان خواردووە کە داخراون، ئێستا بەشێکیان بە هەوڵی وەزارەتی ناوخۆ گەڕێنراونەتەوە هەرێمی کوردستان. لەهەمان کاتدا وەزارەتی ناوخۆ و فەرمانگەی پەیوەندییەکانی دەرەوەی حکومەتی هەرێمی کوردستان لەڕێگەی فۆرمێکی تایبەت لە هەوڵی گەڕاندنەوەی هاونیشتمانیانی دیکەن.

لێدوانی فەرمی: عەبدولخاڵق محەممەد، بەڕێوەبەری ڕاگەیاندنی فەرمانگەی پەیوەندییەکانی دەرەوەی حکومەتی هەرێمی کوردستان، بە ئاڤا میدیای ڕاگەیاند، بەهۆی زۆری ژمارەی پەیوەندییەکان و لۆدێکی یەکجار زۆر لەسەر هەردوو هێلی گەرم و پەیوەندی بەردەوامی هاووڵاتییان بە بەرپرسانی حکومەتەوە، "تەنها لەدوێنێوە دوو هەزار و 612 پەیوەندی لەو دوو ژمارەیەوە وەرگیراون کە ڕامانگەیاندبوون و هێڵەکان لە کارکردن بەردەوامن".

- "تەواوی هاونیشتیمانیانمان دڵنیادەکەینەوە، لەهەر شوێنێک بن کە تەواوی پەیوەندییەکان وەردەگیرێن و بەردەوام دەبین، ئەوانەی پەیوەندییان بە هێڵە گەرمەکان نەکردووە، دەتوانن زانیارییەکانیان لەم فۆرمە ڕەوانە بکەن".

ئەوەی پێویستە بیزانیت: هێڵە گەرمەکان ئەم دوو ژمارەیەی خوارەوەیە و دەتوانن زانیارییەکان لەسەر وەتس ئەپی ئەم دوو هێلە گەرمە یان لەڕێگەی پرکردنەوەی ئەم فۆرمە ڕەوانە بکەن:

+00964 750 803 5680 

+00964 750 803 5681