لە كەركووک پارچەی مووشەكێک بەر ئۆتۆمبێلی هاووڵاتیەک دەكەوێت

ئاڤا نیوز

پەیامنێریی ئاڤا لە كەركووك چووەتە ئەو شوێنەی گەڕەكی ڕەحیماوە كە پارچەیەكی مووشەك كەوتووەتە خوارەوە و بەر ئۆتۆمبێلی هاووڵاتیەك كەوتووە، بێ ئەوەی زیانی گیانی هەبێت.

زانیاریی بەدەستهاتوو: بەگوێرەی قسەی هێزە ئەمنییەكانی شارەكە، پارچەكە لە پاشماوەی كڵاوەی مووشەك دەچێت، بەڵام هێشتا ئەو زانیارییە یەكلا نەكراوەتەوە و لێكۆڵینەوە لە ڕووداوەكە بەردەوامە.

لێدوانی شایەتحاڵەكان: بەپێی وتەی شایەتحاڵەكان بۆ ئاڤا، ئەو كاتەی پاشماوەی مووشەكەكە لە ئاسمانەوە بەسەر ئۆتۆمبێلەكە بەربووەتەوە، دەنگی بیستراوە و ڕووناكییەكەشی لە ئاسمان بینراوە. دەشڵێن جگە لە زیانێكی كەمی ماددی بۆ خاوەنی ئۆتۆمبێلەكە كە خۆی كرێكارە و ئێستا بۆ كرێكاری لە شاری بەغدایە، هیچ زیانێكی گیانی نەبووە.

بە تەنیشت ئەم بابەتەوە: ئێوارەی ئەمڕۆش لە نزیک سەنگاو، دوو تەنی دیکەی هاوشێوەی یەکتر کەوتنە خوارەوە و هیچ زیانێکی گیانییان لێ نەکەوتەوە. ئاڤا زانیویەتی هەردوو تەنەکە مووشەک و درۆن نەبوون، بەڵکو تانکی و کەپسولی سووتەمەنی بوون و نازانرێت پاڵپشتی مووشەک یان درۆن بوون و لەکاتی تەواوبوونی سووتەمەنییەکەیان و تەواوبوونی ئەرکەکەیان کەوتوونەتە خوارەوە.

ئەمەش بزانە: دوێنێ شەویش پارچەیەکی مووشەک لە ناحیەی حاجی ئۆمەران کەوتەخوارەوە، ئەویشیان بێ زیان بوو.