فایلی خەڵک؛ لە مەخموور زەویی نیشتەجێبوون کێشەی بۆ ژمارەیەک هاووڵاتی دروستکردووە

ئاڤا نیوز

لە مەخموور زەویی نیشتەجێبوون کێشەی بۆ ژمارەیەک هاووڵاتی دروستکردووە و کێشەکەش دەگەڕێتەوە بۆ ساڵانی 2003 تا 2012، بەڵام ئێستا سەری هەڵداوەتەوە. هاونیشتمانییان داوا لە ئاڤا دەکەن بەدواداچوون بۆ کێشەکەیان بکات.

وێنە گەورەکە: ژمارەیەک هاونیشتمانی لە مەخمورەوە پەیوەندییان بە ئاڤاوە کردووە، دەڵێن ئێمە لە گەڕەکی شەهیدانین، پارچەیەک زەوی لە بەرامبەر ماڵەکانمان هەیە و بۆ سەوزایی تەرخان کراوە و زەویی شارەوانییە، ئێمەش باخچەمان لەسەر دروست کردووە، ئێستا ئەو زەوییانە کراونەتە زەوی نیشتەجێبوون، پارچە پارچە کراون و بەسەر خەڵکی دیکە دابەشکراون و دراونەتە بەرپرسانی ئیداری مەخموور.


لێدوانی فەرمی: لەسەر ئەم کێشەیە ئەندازیار زیرەک حەسەن، بەڕێوەبەری شارەوانیی مەخمور بە ئاڤای گوت:  ئەو زەوییە موڵکی شارەوانییە و لە نەخشە بۆ سەوزایی دانەنراوە، دابەشکردنی زەوییەکانیش دەگەڕێتەوە بۆ ساڵانی 2003 تا 2012، هەر کەسێک لە دانیشتووانی ئەو کۆڵانە پارچەیەک زەوی پێدراوە، پارچە زەوییەکانی دیکەش کە ماونەتەوە،  بەپێی یاسا و ڕێنمایی بەسەر خەڵکی شایستەی خەڵکی مەخمور دابەشکراون.

بەڕێوەبەری شارەوانی مەخمور دەڵێت، بە سوود وەرگرتن لە بڕیاری پارێزگای هەولێر بۆ ڕێگە پێدان بە دروستکردنی خانوو لەسەر زەوی سندووقی، "ئێمەش ڕێگەمان داوە خاوەنی ئەو پارچە زەوییانە خانوو لەسەر زەوییەکانیان دروست بکەن، دانیشتوانی کۆڵانەکەش کە هەر یەکێکیان پارچەیەک زەوی پێدراوە ڕێگری دەکەن و داوا دەکەن زەوی زیاتریان پێبدرێت، ئێمەش ڕێگە بەمە نادەین".