بەڕێوەبەری فڕۆکەخانەی هەولێر ڕوونکردنەوە لەبارەی ڕاگرتنی گەشتە ئاسمانییەکان دەدات

ئاڤا نیوز

 

بەڕێوەبەری فڕۆکەخانەی نێودەوڵەتیی هەولێر ئاشكرای دەكات، ڕاگرتنی گەشتە ئاسمانییەكان تاوەكو 30ـی ئەم مانگە، بڕیاری دەسەڵاتی فرۆكەوانیی مەدەنی عێراقە و سەرجەم فرۆكەخانەكانی عێراق دەگرێتەوە و هیچ پەیوەندی بە درۆنەكەی شەوی ڕابردووی ئاسمانی هەولێرەوە نییە.

 

وێنە گەورەكە: لە بەشێك لە میدیا عێراقییەكان وەها بڵاوكراوەتەوە كە پاش درۆنەكەی شەوی ڕابردووی ئاسمانی هەولێر، گەشتە ئاسمانییەكان لە فرۆكەخانەی نێودەوڵەتیی هەولێر تاوەكو 30ـی ئەم مانگە ڕاگیراوە.

 

لێدوانی فەرمی: ئەحمەد هۆشیار، بەڕێوەبەری فڕۆکەخانەی نێودەوڵەتیی هەولێر تایبەت بە ئاڤا ڕایگەیاند، بەهۆی بەردەوامی جەنگ و جووڵەی فرۆكەی جەنگی و مووشەك و درۆن،ئاسمانی عێراق جگە لە فرۆكەخانەی بەسڕە، تا 30ـی ئەم مانگە بە داخراوی دەمێنێتەوە، نە ئێمە وەك حكومەتی هەرێمی كوردستان و نە عێراقیش، ناتوانین بڕیار لە دەستپێكردنەوەی گەشتەكان بدەین، تاوەكو ئاسمانی ناوچەكە لە جەنگ پاك نەبێتەوە.

 

- بەڕێوەبەری فرۆكەخانەی نێودەوڵەتیی هەولێر دووپاتیشی كردەوە، دیار نییە كەی گەشتە ئاسمانییەكان دەستپێدەكاتەوە تا دۆخی ناوچەكە ئاسایی نەبێتەوە.

 

ئەوەی پێویستە بیزانیت: بۆ گەڕانەوەی عێراقییەکان لە وڵاتانی كەنداو، تەنیا فڕۆکەخانەی نێودەوڵەتی بەسڕە کراوەیە، ئەوەش دوای بڕیاری دەسەڵاتی فڕۆکەوانی مەدەنی بە درێژكردنەوەی ماوەی كردنەوەی فرۆكەخانەكە لە کاتژمێر 4:00ی بەیانی ئەمڕۆوە تا کاتژمێر 10:00ی ئەمشەو.

 

كاریگەری و لێكەوتەكان: تا دوێنێ زیاتر لە 220 گەشتی ئاسمانی لە فرۆكەخانەی نێودەوڵەتیی هەولێر هەڵوەشێنرایەوە، هاوكات نزیكەی 5 هەزار تكت كە لەلایەن گەشتیارانەوە كڕدراوە  و سوودیان لێ نەبینراوە. بۆ قەرەبووكردنەوەی ئەو گەشتیارانەی تكتی فرۆكەیان كڕیوە، فرۆكەخانەی هەولێر ناتوانێت قەرەبوویان بكاتەوە، بەڵكو گەشتیاران دەبێت لەگەڵ هێڵەكانی ئاسمانی لەمبارەیەوە گفتوگۆ بكەن.