پزشکیان: ئەگەر ئەمریکا ئیسرائیل ڕانەگرێت، وەڵامی تووندتری ئیسرائیل دەدەینەوە

ئاڤا نیوز

مەسعود پزشکیان، سەرۆککۆماری ئێران پەیوەندییەکی تەلەفۆنی لەگەڵ هەیسەم بن تاریق، سوڵتانی عومان ئەنجام دا و تیایدا هەر دوولا باسیان لە هێرشەکانی ئیسرائیل و ئێران بۆ سەر یەکدی کرد.

لێدوانی فەرمی: پزشکیان بە سوڵتانی عومانی ڕاگەیاند، هێرشەکانی ئیسرائیل و کوشتنی فەرماندەکانی سوپا ئێران لاواز ناکەن و ئەو وڵاتە ئامادەیی تەواوی بۆ وەڵامدانەوەی هێرشەکان هەیە. ئەو گوتیشی ئەگەر ئیسرائیل لە هێرشەکان بەردەوام بێت و ئەمریکا کۆنترۆڵی نەکات، ئەوا وەڵامی زۆر تووندتریان دەدرێتەوە.

ئەوەی پێویستە بیزانیت: عومان لە دانوستانە ئەتۆمییەکانی نێوان ئێران و ئەمریکادا ڕۆڵی نێودەندگیریی دەگێڕێت و پەیمانی هەردوو وڵات بۆ یەکدی دەگوازێتەوە.