فوئاد حوسێن هۆشداری بە ئیسرائیل دەدات؛ بەکارهێنانی ئاسمانی عێراق قبووڵکراو نییە

ئاڤا نیوز

وەزیری دەرەوەی عێراق دووپاتی دەکاتەوە، پێشێلکردنی ئاسمانی عێراق لە لایەن ئیسرائیل و هەر وڵاتێکی دیکە بۆ هێرشکردنە سەر وڵاتان قبووڵکراو نییە.

وێنە گەورەکە: فوئاد حوسێن، وەزیری دەرەوەی عێراق پەیوەندییەکی تەلەفۆنیی لە ئەنتۆنیۆ تایانی، هاوتا ئیتاڵییەکەی پێگەیشت، هەردوولا تاوتوێی دۆخی ناوچەکە و شەڕی نێوان ئێران و ئیسرائیلیان کرد.

ڕاگەیێنراوی فەرمی: بەگوێرەی ڕاگەیێنراوی وەزارەتی دەرەوەی عێراق، فوئاد حوسێن دووپاتی کردووەتەوە کە گرنگە هێرشەکانی هەردوولا ڕابگیرێت و پێویستە بێ لایەنیی عێراق بپارێزرێت و دووربخرێتەوە لە جەنگەکە، ناوبراو جەختیشی کردووە کە پێشێلکردنی ئاسمانی عێراق لەلایەن ئیسرائیلەوە قبووڵکراو نییە، ئەوە پێشێلکردنێکی ڕوونی یاسای نێودەوڵەتییە.

لە لایەکی دیکەوە: ئەنتۆنیۆ تایانی، وەزیری دەرەوەی ئیتاڵیا پشتیوانی وڵاتەکەی بۆ ئاسایش و سەقامگیری عێراق دووپات کردەوە و ئاماژەی بەوەدا کە وڵاتەکەی لەگەڵ هاوبەشە ئەوروپییەکان هەماهەنگی دەکات بۆ ئەوەی فشاری دیپلۆماسی بکەن بە ئامانجی کەمکردنەوەی گرژی و ئاڵۆزییەکان.

ئەوەی پێویستە بیزانیت: حکومەتی عێراق بەهۆی بەکارهێنانی ئاسمانەکەی لەلایەن ئیسرائیلەوە بۆ هێرشکردنە سەر ئێران، سکاڵای دژی ئەو وڵاتە لە ئەنجوومەنی ئاسایشی نێودەوڵەتی تۆمار کردووە.