ئەمشەو لە بەغدا بە بەشداریی سوودانی دوو کۆبوونەوە لەبارەی مووچە کران

ئاڤا نیوز

 

بە ئامادەبوونی سەرۆکوەزیرانی عێراق و زۆرینەی بەرپرس و سەرکردەکانی ئیدارەی دەوڵەت کۆبوونەوەیەکی تایبەت بە مەترسی بەرفراوانبوونی جەنگی نێوان ئیسرائیل و ئێران تاوتوێکرا؛ جێگری سەرۆکی پەرلەمانی عێراقیش بابەتی مووچەی فەرمانبەرانی هەرێمی کوردستان دەخاتە بەرباس. 

 

چیرۆکی سەرکی: هاوپەیمانی ئیدارەی دەوڵەت بەئامادەبوونی محەممەد شیاع سوودانی، سەرۆکوەزیران و مەحموود مەشهەدانی، سەرۆکی پەرلەمان و زۆربەی سەرکردەکانی هاوپەیمانیەکە کە لایەنە پێکهێنەرەکانی حکومەتی عێراق لەخۆدەگرێت، ئەمڕۆ 16-6-2025 کۆبوونەوەی ئاسایی خۆی ئەنجامدا.

 

ڕاگەیێنراوی فەرمی: شاخەوان عەبدوڵڵا، جێگری سەرۆکی پەرلەمانی عێراق ڕاگەیێنراوێکی لەبارەی کۆبوونەوەی ئەمشەوی ئیدارەی دەوڵەت بڵاوکردووەتەوە و دەڵێت: بابەتی ئەمشەوی کۆبوونەوەکە تایبەت بوو بە جەنگی نێوان ئیسرائیل و ئێران بەڵام بابەتی مووچەی فەرمانبەرانی هەرێمی کوردستان بۆ من گرنگتربوو بۆیە باسی ئەوەم کرد.

 

- بەڕوونی تیشکمان خستەسەر کاریگەرییەکانی خەرج نەکردنی مووچەی فەرمانبەران و برسی کردنی زیاتر لە یەک ملیۆن مووچەخۆر دەبێت کاری لە پێشینەی هەموولایەک بێت. 

- پێویستە هەرچی زووە ئەم کێشەیە چارەسەر بکرێت چونکە مووچەخۆرانی هەرێمی کوردستان تەواو بێزار و نیگەرانن لە بڕینی مووچەکانیان. 

- بەشێک لە سەرکردەکان تەواو هاوڕابوون لە دۆزینەوەی چارەسەرێک بۆ ئەم کێشەیە. 

 

لەلایەکی دیکەوە: لە بەشێکی دیکەی ڕاگەیێنراوەکەیدا جێگری سەرۆکی پەرلەمان باسی لەوەشکردووە کە هەر ئەمشەو بە ئامادەبوونی سەرۆکوەزیرانی عێراق، کۆبوونەوەیەکی دیکەمان هەبووە لەسەر بابەتی مووچەی فەرمانبەران.

هەوڵەکانمان سبەی لە ڕووی یاسایی و ئیدارییەوە بەردەوام دەبن بۆ چارەسەرکردنی ئەم کێشەیە.