کێشەی جووتیارانی مەخموور دەبردرێتە کۆبوونەوەی ئەنجوومەنی وەزیران

ئاڤا نیوز

هێشتا سایلۆی مەخموور بەڕووی گەنمی جووتیارانی سنوورەکە نەکراوەتەوە، بڕیارە لە کۆبوونەوەی ئەمڕۆی ئەنجوومەنی وەزیران پرسەکە یەکلایی بکرێتەوە؛ سەدان جووتیار لەو ڕاگرتنە زەرەرمەندن.

 

وێنە گەورەکە: بەبیانووی ئەوەی هۆبە کشتوکاڵییەکانی بەشێکی ناوچە کوردستانییەکانی سنووری نەینەوا، گرێبەستە کشتوکاڵییەکانیان لەسەر پارێزگای هەولێر و دهۆک کردووە دەبێت لە بەڕێوەبەرایەتییەکانی سەر بە عێراق نوێبکرێنەوە، پرۆسەی وەرگرتنی گەنم لە مەخموور و بەشێکی دیکە ناوچەکانی نەینەوا وەستاوە.

 

لێدوانی فەرمی: ڕزگار محەممەد، قایمقامی قەزای مەخموور بە ئاڤای ڕاگەیاند، "بڕیارە ئەمڕۆ لە ئەگەری بەڕێوەچوونی کۆبوونەوەی ئەنجوومەنی وەزیرانی عێراق پرسەکە بەبوون و نەبوون یەکلایی بکرێتەوە، یان گەنمی جووتیاران لە سایلۆی مەخموور وەردەگیرێت، یان دەیبەینە سایلۆکانی هەولێر."

 

ئەمەش بزانە: نزیکەی سێ هەزار جووتیار لە سنووری قەزای مەخموور، نزیکەی 150 هەزار دۆنم زەوییان بە گەنم داچاندووە و چاوەڕێی وەرگرتنی گەنمەکانیان دەکەن.