ئەکسیۆس: واشنتن پێشنیازی کۆبوونەوەی بۆ تاران کردووە

ئاڤا نیوز

 

ئاژانسی ئەکسیۆس لەزاری بەرپرسانی ئەمریکییەوە ئاشکرای دەکات، کۆشکی سپی لەسەر ئەگەری ئەنجامدانی کۆبوونەوەیەک لەم هەفتەیەدا لەگەڵ ئێران گفتوگۆ دەکات.

وێنە گەورەکە: شەڕی نێوان ئیسرائیل و ئێران کەوتووەتە ڕۆژی پێنجەمییەوە، هەڕەشەکانی هەردوولا بۆ سەر خاکی یەکتری زیاتر دەبێت، ئیسرائیل پێداگرە لەسەر ئەوەی نابێت هەڕەشە ئەتۆمییەکانی ئێران بمێنێن.

زانیاریی بەدەستهاتوو: چوار سەرچاوەی ئاگادار لەم بابەتە بە ئاکسیۆسیان ڕاگەیاندووە، تیمی ترەمپ تاوتوێی ئەگەری ئەنجامدانی کۆبوونەوەیەک لەنێوان  ستیڤ ویتکۆف، نێردەی ترەمپ بۆ ڕۆژهەڵاتی ناوەڕاست و عەباس عێراقچی، وەزیری دەرەوەی ئێران بۆ ئەم هەفتەیە دەکات، ئامانجی کۆبوونەوە تاوتوێکردنی دەستپێشخەرییەکی دیپلۆماسییە بۆ ڕێککەوتن لەسەر بەرنامە ئەتۆمییەکەی ئێران و کۆتاییهێنان بە شەڕی نێوان ئیسرائیل و ئێران.

ئەوەی لەبارەیەوە دەگوترێت: بەرپرسێکی ئەمریکی بۆ ئەکسیۆس ئەم بابەتەی پشتڕاست کردووەتەوە کە لەم هەفتەیەدا پرسی کۆبوونەوەیەک لەگەڵ ئێرانییەکان تاوتوێ دەکرێت.

لێدوانی فەرمی: دۆناڵد ترەمپ، سەرۆکی ئەمریکا جەختی لەوە کردەوە، دەبێت ئێران ڕێگەی دانوستان بگرێتە بەر پێش ئەوەی درەنگ بێت.

ئەوەی پێویستە بیزانیت: ئامانجی ئیسرائیل لەم شەڕەدا نەهێشتنی بەرەی تیرۆر، لەناوبردنی پرۆگرامی ئەتۆمی و توانای دروستکردنی مووشەکە.

باکگراوند: تاوەکو ئێستا ئەمریکا و ئێران پێنج گەڕی دانوستانیان بۆ پرسی ئەتۆمی ئێران ئەنجامداوە، لەمیانەی ئامادەکاریی بۆ شەشەم گەڕی دانوستان ئیسرائیل هێرشی خۆی بۆ سەر ئێران دەستپێکرد، بەمەش دانوستانەکان بەردەوامی پێنەدرا.