کۆبوونەوەی دادگەی فیدڕاڵی سەبارەت بە مووچە دەکەوێتە هەفتەی داهاتوو

ئاڤا نیوز

 

ئەندامێکی پەرلەمانی عێراق ئاماژە بەوەدەدات، ئەم هەفتەیە کۆبوونەوەی دادگەی فیدڕاڵی سەبارەت بە بەدەرکردنی ئەمری وەلایی لەبارەی مووچەی مووچەخۆران بەڕێوە ناچێت.

 

چیرۆکی سەرەکی: دادگەی فیدراڵی بەرزترین دەسەڵاتی دادوەرییە لە عێراق بۆ یەکلاکردنەوەی پرسی مووچەی فەرمانبەران، کە یەکێک لە گەورەترین کێشەکانی ئێستای نێوان هەولێر و بەغدایە، مووچەخۆرانی کوردستان بە تۆمارکردنی سکاڵایەک هانایان بۆ دادگاکە بردووە کێشەکە یەکلایی بکاتەوە.

 

لێدوانی فەرمی: چرۆ حەمەشەریف، ئەندامی پەرلەمانی عێراق؛ بە ئاڤای گوت، "بەگوێرەی بەدواداچوونمان لە دادگەی فیدراڵی، یەکێک لە داوەرەکان هێشتا لە فەریزەی حەج نەگەڕاوەتەوە، بۆیە لەم هەفتەیە کۆبوونەوەکە ناکرێت و چاوەڕوان دەکرێت ڕۆژی سێشەممەی داهاتوو کۆبوونەوەکە بەڕێوە بچێت."

 

ئەوەی پێویستە بیزانیت: بەپێی خشتەی کۆبوونەوەکانیان، دادگەی فیدراڵی دەبێت 18ی مانگ کۆببێتەوە، بەڵام لەبەر ئەوەی مووچە پرسێکی گرنگە، بڕیار بوو ڕۆژی دووشەممە لەبارەی مووچەی فەرمانبەرانی هەرێمی کوردستان کۆببێتەوە و کێشەکە لەنێوان هەولێر و بەغدا بە فەرمانێکی سالاری (وەلائی) یەکلایی بکاتەوە، بەڵام کۆبوونەوەکە نەکرا.