هونەرمەند عەزیز وەیسی: 50%ی ئەو کەسانەی تاران جێدەهێلن ڕوو لە ڕۆژهەڵاتی کوردستان دەکەن

ئاڤا نیوز

هونەرمەندی کورد عەزیز وەیسی دەڵێت، شارەکانی ڕۆژهەڵاتی کوردستان ئارامترن لە شارەکانی دیکەی ئێران، بۆیە 50%ی ئەو کەسانەی تاران جێدەهێلن ڕوو لە ڕۆژهەڵاتی کوردستان دەکەن.

لێدوانی فەرمی: هونەرمەند عەزیز وەیسی بە ئاڤای گوت: چەند هێرشێک کرانە سەر کرماشان، بەڵام دۆخی ڕۆژهەڵاتی کوردستان باشتر و ئارامترە لە تاران و شارەکانی دیکەی ئێران، من و خێزانەکەم لە تاران بووین و ڕۆژێک پێش دەستپێکردنی شەڕ گەڕاینەوە جوانڕۆ.

- هاتنە دەرەوە لە تاران ئەستەم بووە، دوو سێ خێزانی هاوڕێم لە تارانەوە بەڕێکەوتوون بەرەو جوانڕۆ، نزیکەی هەشت کاتژمێر و نیو بەڕێوە بوون، تەنیا 60 کیلۆمەتریان بری بوو.

- %50ی ئەو کەسانەی تاران جێدەهێلن ڕوو لە ڕۆژهەڵاتی کوردستان دەکەن، خەڵکی شارە کوردییەکانیش باوەشی بۆ کردوونەتەوە و لە ماڵەکانی خۆیان جێگەیان بۆ دەکەنەوە، ناهێڵن ئەو خەڵکە لە سەر شەقام بمێننەوە یان هۆتێل بگرن.

- نزیکەی دوو هەزار تەلەفۆنم لە باشووری کوردستان بۆ هاتووە،  بۆ هەواڵ پرسین و داوا دەکەن بچمە لایان تا ئەم بارودۆخە ئارام دەبێتەوە، هەندێ هونەرمەندی باشوور کە لە ڕابردوو هیچ پەیوەندیێکمان نەبووە تەلەفۆنیان بۆ کردووم.

- هەینی داهاتوو دێمە هەرێمی کوردستان، کارێکی ڕیکلامم هەیە و منداڵەکانیش ماوەیەک دێنمە باشوور.

- لە ڕۆژهەڵاتی کوردستان نزیکەی 70% هونەرمەندان کارەکانیان ڕاگرتووە، لەم ماوەیە ژمارەیەک ئاهەنگم هەبوون بەڵام هەموویانم هەڵوەشاندەوە، کلیپێکیشم ئامادە کردووە، بەڵام تا ئەو بارودۆخە ئارام نەبێتەوە بڵاوی ناکەمەوە.