سایلۆی مەخموور بەڕووی وەرگرتنی گەنمی جووتیارانی کورد دەکرێتەوە

ئاڤا نیوز

بەبڕیاری سەرۆکوەزیران عێراق سایلۆی مەخموور بۆ وەرگرتنی گەنمی جووتیاران دەکرێتەوە، لەچەند ڕۆژی داهاتوو پرۆسەکە دەستپێدەکات.

 

وێنە گەورەکە: ماوەی مانگێکە پرۆسەی وەرگرتنی گەنمی جووتیاران لە پارێزگاکانی عێراق دەستیپێکردووە، بەڵام لە بەشێکی ناوچەکانی نەینەوا بە بیانووی ئەوەی هۆبە کشتوکاڵییەکانی بەشێکی ناوچە کوردستانییەکانی سنووری نەینەوا، گرێبەستە کشتوکاڵییەکانیان لەسەر پارێزگای هەولێر و دهۆک کردووە سایۆلۆکان نەکراونەتەوە، جووتیاران ناچار دەبوون لە سایلۆکانی هەولێر و دهۆک گەنمەکانیان ڕادەست بکەن.

 

لێدوانی فەرمی: ئەحمەد کیکی، سەرۆکی فراکسیۆنی پارتی لە ئەنجوومەنی پارێزگای نەینەوا بە ئاڤای گوت، "بەبڕیاری محەممەد شیاع سوودانی، لێبەدەرکردن بۆ سایلۆی مەخموور کراوە، دوای تەواوبوونی چەند ڕێکارێکی تەکنیکی دەرگای سایلۆی بەڕووی وەرگرتنی گەنمی جووتیاران دەکرێتەوە."

 

ئەمەش بزانە: نزیکەی سێ هەزار جووتیار لە سنووری قەزای مەخموور، نزیکەی 150 هەزار دۆنم زەوییان بە گەنم داچاندووە و چاوەڕێی وەرگرتنی گەنمەکانیان دەکەن.