حكومەتی هەرێمی كوردستان لەبارەی جەنگی نێوان ئیسرائیل و ئێران هەڵوێستی خۆی ڕادەگەیێنێت

ئاڤا نیوز 

 

حکومەتی هەرێمی کوردستان لەسەر سێ تەوەری جیاواز کۆبووەوە و تەوەری سەرەکی کۆبوونەوەکەشی جەنگی ئێستای نێوان ئیسرائیل و ئێران بووە، هەروەها پرسی کاریگەرییەکانی لە ڕووی ئابووری و سیاسییەوە هەڵسەنگاندنی بۆ کراوە. گوتەبێژی حكومەتی هەرێمی كوردستان باس لەوە دەکات کە کوردستان دڵنیایی دەدات بە دراوسێکانی کە نابێتە بەرەی درووستکردنی کێشە بۆیان. 

 

وێنە گەورەکە: ماوەی شەش ڕۆژە جەنگی نێوان ئیسرائیل و ئێران سەریهەڵداوە و هەردوولا هەڕەشەی فراوانکردنی بەرەی شەڕ لە یەکتری دەکەن، ئەمەش کاریگەریی تەواوی لەسەر دۆخی ئێستای ڕۆژهەڵاتی ناوەڕاست دروستکردووە، هەرێمی کوردستان و عێراقیش لەو نێوەندە بەدوور نین لەو گرژیی و ئاڵۆزییانە. 

 

لێدوانی فەرمی: پێشەوا هەورامانی، گوتەبێژی حكومەتی هەرێمی كوردستان لەبارەی جەنگی نێوان ئیسرائیل و ئێران ڕایگەیاند: هەرێمی کوردستان دەیەوێت فاکتەری سەقامگیری و ئاشتی و ئارامی بێت و پێمان وایە پێویستە کێشەکان بە گفتوگۆ و دانوستان چارەسەر بکرێن، دڵنیاییەکی تەواویش بە دراوسێکانی هەرێمی کوردستان دەدەین لە سنورەکانی ئێمەوە کێشەیان بۆ دروست ناکرێت. 

 

زانیاریی زیاتر: لە بەشێکی دیکەی کۆبوونەوەکەشدا تەوەرێکی گرنگ باسکراوە کە پرسی مووچەی فەرمانبەرانی هەرێمی کوردستان و لە پێش جەژنی قوربانەوە بە نایاسایی لەلایەن وەزارەتی دارایی عێراقەوە ڕاگیراوە، وتەبێژی حکومەتی هەرێمی کوردستان لەوبارەیەوە ڕایگەیاند، سەرۆکوەزیران مەسرور بارزانی لەبارەی مووچەوە نامەیەکی بۆ دادگەی فیدراڵی ناردووە و بەم نزیکانە کۆدەبێتەوە و بڕیار لەسەر مووچە دەدات.