وتەبێژی کۆمیسیۆن بۆ ئاڤا: هیچ ئاماژە و بڕیارێک بۆ درێژکردنەوەی تۆماری بایۆمەتری نییە

ئاڤا نیوز

وادەی نوێکردنەوەی تۆماری بایۆمەتری لە عێراق لەکۆتایی نزیک دەبێتەوە، کۆمیسیۆنی هەڵبژاردنەکانی عێراقیش دەڵێت، هیچ ئاماژە و بڕیارێکی فەرمی بۆ نوێکردنەوەی ئەو وادەیە نییە.

وێنە گەورەکە: تۆماری بایۆمەتری یەکێکە لە قۆناغە سەرەکییەکانی بەڕێوەچوونی هەر هەڵبژاردنێک لە عێراق، بەگوێرەی ڕێنماییەکانی کۆمیسیۆنیش هەر عێراقییەک ناوی لە لیستی تۆماری بایۆمەتریدا نەبێت و کارتی دەنگدانی نەبێت، ناتوانێت بەشداری هەڵبژاردن بکات.

لێدوانی فەرمی: جومانە غەلای، وتەبێژی کۆمیسیۆنی هەڵبژاردنەکانی عێراق بە ئاڤا میدیای ڕاگەیاند، 20ی ئەم مانگە کۆتا وادەیە بۆ نوێکردنەوەی تۆماری بایۆمەتری، تائێستاش هیچ بڕیارێک بۆ درێژکردنەوەی تۆماری بایۆمەتری نییە.

- ئەگەر کۆمیسیۆن بیەوێت ماوەی نوێکردنەوەی تۆماری بایۆمەتری درێژبکاتەوە، ئەنجوومەنی کۆمیسیاران دەتوانێت ئەو بڕیارە بدات و بەگوێرەی پێویست ماوەیەکی دیکەش دەرفەت بە هاووڵاتیان بدات.

ژمارەکان وادەڵێن: بەگوێرەی ئامارەکانی کۆمیسیۆن لە کۆی نزیکەی 29 ملیۆن عێراقی کە مافی دەنگدانیان لە هەڵبژاردنی پەرلەمانی عێراق لە 11ی تشرینی دووەمی ئەمساڵدا هەیە، تائێستا زیاتر لە 21 ملیۆن کەسیان تۆماری بایۆمەترییان کردووە و دەتوانن بەشداری هەڵبژاردن بکەن.

گۆشەیەکی دیکەی دیمەنەکە: ئامادەکارییەکانی کۆمیسیۆن بۆ هەڵبژاردن لەکاتێکدایە بەهۆی ناکۆکی ناوماڵی شیعە لەسەر یاسای هەڵبژاردنەکان و  شەڕی نێوان ئیسرائیل و ئێران، دواخستنی هەڵبژاردن بۆ ساڵی داهاتوو هەردەم وەک گریمانەیەک هەیە و بەردەوام باسی لێوەدەکرێت، ئەویش بەهۆکاری ئەوەی لەکاتی نائاساییدا وڵات ناتوانێت بچێتەناو هەڵبژاردنەوە.