ڕۆژنامەیەکی ئەمریکی: ئێران پێشنیازی ترەمپ بۆ دانوستان قەبووڵ دەکات

ئاڤا نیوز

سەرەڕای بەردەوامبوونی هێرشەکانی نێوان ئێران و ئیسرائیل، ڕۆژنامەیەکی ئەمریکی ئاشکرای دەکات، ئەگەری ڕازیبوونی ئێران بە پێشنیازی ئەمریکا بۆ دانوستان لە ئارادایە.

بڵاوکراوەی فەرمی: ڕۆژنامەی نیویۆرک تایمزی ئەمریکی بە پشتبەستن بە بەرپرسێکی باڵای وەزارەتی دەرەوەی ئێران ئاشکرای دەکات،''پێدەچێت ئێران بەم زووانە پێشنیازی دۆناڵد ترەمپ، سەرۆکی ئەمریکا بۆ دانوستان قەبووڵ بکات''

زانیاریی بەدەستهاتوو: ڕۆژنامەکە لەزاری بەرپرسێکی ئێرانی نەیویستووە ناوی ئاشکرا بێت ڕایگەیاندووە عەباس عێراقچی، وەزیری دەرەوەی ئێران بە کۆبوونەوەی لەگەڵ ئەمریکا بۆ تاوتوێکردنی ئاگربەست لەگەڵ ئیسرائیل و بەرنامەی ئەتۆمی ئێران ڕازی دەبێت.

لەلایەکی دیکەوە: تاران و واشنتن پێنج گەڕی دانوستانیان ئەنجامداوە، بەڵام بێ ئەنجام بوون لەسەر ئەم پرسە دوێنی چوارشەممە ترەمپ ڕایگەیاند، ماوەی ئێران بۆ ڕێککەوتن تەواو بووە و ئێستاش کەس نازانی چی دەکەم بەتایبەت لە ئەگەری هێرشکردنە سەر ئێران ڕەنگە بیکەم، ڕەنگە نەیکەم.

قووڵتر: سەرەڕای ئەوەی ئاژانسی ڕۆیتەرز بڵاویکردەوە کە شاندێکی ئێرانی بەرەو عومان بەڕێککەوتن بۆ ئەنجامدانی دانوستان، بەڵام ئەم هەواڵە ڕاستەوخۆ لەلایەن وەزیری دەرەوەی ئێران ڕەتکرایەوە.