ئیسرائیل: هەردوو وێستگەی ئەتۆمیی نەتەنز و ئەراکمان بۆردوومانکرد

ئاڤا نیوز

 

سوپای ئیسرائیل ئەمڕۆ ڕایگەیاند، فڕۆکە جەنگییەکانیان وێستگە ناوەکییەکانی پەرەپێدانی چەکی ئەتۆمییان لە ئەراک و نەتەنز لە ئێران، بۆردوومان کردووە.

 

بڵاوکراوەی فەرمی: سوپای ئیسرائیل لە راگەیەندراوێکدا دەڵێ شەوی ڕابردوودا نزیکەی 40 فڕۆکەی جەنگی بەشدار بوون لە هێرشکردنە سەر دەیان پێگەی جیاواز لە ئێران. 

 

بنیامین نەتەنیاهۆ، سەرۆکوەزیرانی ئیسرائیل رایگەیاند هێزەکانی وڵاتەکەی دامەزراوەی سەرەکیی پیتاندنی یۆرانیۆمیان لە ناوچەی نەتەنز وێران کردووە.

 

هێرشەکان شوێنەکانی بەرهەمهێنانی چەکی ئەتۆمی، کارگەکانی بەرهەمهێنانی سەنتەرفیوژن و شوێنەکانی لێکۆڵینەوە و "پەرەپێدانی چەکی ئەتۆمییان" کردووەتە ئامانج.

 

 زانیاریی زیاتر: لە راگەیەندراوەکەدا سوپای ئیسرائیل دەشڵێ، کارگەکانی کەرەستەی خاو، پێکهاتەکان بۆ دروستکردنی مووشەک و پێگەکانی بەرهەمهێنانی سیستەمی بەرگریی ئاسمانی ئێرانیان لەنێوبردووە.

 

لەلایەکی دیکەوە: سوپای ئیسرائیل دووپاتیکردەوە، بەردەوام دەبن لە هێرشەکانیان دژی پڕۆژەی پەرەپێدانی چەکی ئەتۆمیی ئێران بۆ پاراستنی خەڵکی مەدەنی لە ئیسرائیل.

 

باکگراوند: ئێران هەمیشە رەتیکردووەتەوە هەوڵی دابێ چەکی ئەتۆمی بەدەستبهێنێت.

 

ئێران لە ساڵی 2000 لە وێستگەی ئەراک دەستی بە کارکردن کردووە بۆ لێکۆڵینەوەی ئەتۆمی و لە ساڵی 2015 بەهۆی رێککەوتنی لەگەڵ زلهێزانی جیهان لەبارەی راگرتنی بەرنامە ئەتۆمییەکەی، دەستبەرداری وێستگەکە بوو.