هەڵمەتێک بۆ هاوکاریکردنی زیانلێکەوتووانی لافاوەکەی دهۆک ڕادەگەیێنرێت

ئاڤا نیوز

دەستەی وەبەرهێنانی هەرێمی کوردستان هەڵمەتێک بۆ کۆکردنەوەی هاوکاری بۆ زیانلێکەوتووانی لافاوەکەی دهۆک و زاخۆ ڕادەگەیێنێت.

وێنە گەورەکە: دەستەی وەبەرهێنان بەمەبەستی کۆکردنەوەی هاوکاری بۆ لێقەوماوان و زیانلێکەوتووانی لافاوەکەی دهۆک، بانگەوازێک ئاراستەی یەکێتیی وەبەرهێنەران، ژوورەکانی بازرگانی، سەرمایەداران، وەبەرهێنەران، بازرگانانی ناوخۆ و دەرەوە دەکات.

لێدوانی فەرمی: بەرگەشت ئاکرەیی، گوتەبێژی دەستەی وەبەرهێنان، لەڕێگەی ئاڤا نیوزەوە داوای لە هەموو لایەک کرد لە هەڵمەتەکە بەشداربن و ئەرکێکی مرۆیی و نیشتمانییە.

زانیاریی زیاتر: دوای کۆکردنەوەی ھـاوکارییەکان، بەهەماهەنگی لەگەڵ پارێزگاری دهۆک و لایەنی پەیوەندیدار، هاوکارییەکان بەپێی زەرەر و زیانەکان بەسەر هاونیشتمانیان دابەش دەکرێن.

باکگراوند: بەهۆی لافاوەکەی دوێنێ سنووری پارێزگای دهۆک؛ سێ کەس گیانیان لە دەست دا و زیاتر لە 10 کەس بریندار بوون، زیاتر لە 100 ماڵ، نزیکەی 100 ئۆتۆمبێل و دەیان دوکان و شوێنی بارزگانی بەر لافاو کەوتن. 

 ئەمەش بزانە: ئەمڕۆ چوارشەممە لە پەیامێکدا بەبۆنەی جەژنی نەورۆز لە ئاکرێ، سەرۆکوەزیران مەسرور بارزانی بەڵێنی دا سەرجەم زیانلێکەوتووانی لافاوەکە قەرەبوو بکەنەوە.