پزیشکیان: ناتوانین کێشەی ئاوی تاران چارەسەر بکەین

ئاڤا نیوز

مەسعود پزیشکیان، سەرۆک کۆماری ئێران، دوپاتی دەکاتەوە کە سوورە لەسەر گواستنەوەی پایتەخت لە تارانەوە بۆ شارێکی دیکەی نزیک کەنداو، ئەمەش لەبەر چارەسەر نەبوونی کێشەی کەمئاوی. 

وێنە گەورەکە: ماوەی چەند ساڵێکە بە هۆی گۆڕانکاری کەشوهەواوە، بەشێک لە شارەکانی ئێران ڕووبەڕووی گرفتێکی کەمئاوی بوونەتەوە و چارەسەرکردنیشی بووەتە ئەستەم بە هۆی نەبارینی بارانەوە و دووری سەرچاوەی ئاوی خاوێن. 

لێدوانی فەرمی: پزیشکیان ڕایگەیاند: "کاتێک کە گوتمان دەبێت پایتەخت بگوازینەوە، کە هەڵبەتە تەنانەت بودجەی پێویستمان بۆ ئەوە نەبوو، ئەگەر هەمانبوایە لەوانەیە ئەنجام بدرایە، ئەو کات دەگوترا ئەم قسانە نابنە کردار. بەڵام ڕاستییەکە ئەوەیە کە هیچ بژاردەیەکی دیکەمان نییە و ناچارین. ناتوانین زیاتر لەمە دانیشتووان و باڵەخانەکان زیاتر بکەین. ناتوانین کێشەی ئاو چارەسەر بکەین."

زانیاریی زیاتر: بە گوێرەی هەڵسەنگاندنەکان گواستنەوەی هەر مەترێک ئاو لە کەنداوەوە بۆ تاران نزیکەی 500 هەزار تمەنی تێدەچێت، بۆیە پزیشکیان دەڵێت: ئەم هەموو تێچووە لۆژیکی نییە، بەڵکو دەبێت یەکجار و بۆ هەمیشە ئەم کێشەیە چارەسەر بکرێت.