وەزارەتی کارەبای عێراق: بەرهەمهێنانی کارەبا لە وزەی خۆر دەگاتە 12 هەزار مێگاوات

ئاڤا نیوز

وەزیری کارەبای عێراق ئاشکرای دەکات، وەزارەتەکە پلانێکی پێنج ساڵەی تاوەکو ساڵی 2030 داڕشتووە بۆ گەیشتن بە بەرهەمهێنانی 12 هەزار مێگاوات کارەبا لە وزەی خۆر.

وێنە گەورەکە: بەرهەمهێنانی کارەبا لەڕێگەی وزەی خۆر وەک یەکێک لە سەرچاوە گرنگەکانی دابینکردنی وزە دادەنرێت لەسەر ئاستی جیهان، حکومەتی عێراقیش لەڕێگەی دانانی سیستمی بەرهەمهێنانی کارەبا لە وزەی خۆر، فشار لەسەر تۆڕی کارەبای نیشتمانی کەمدەکاتەوە.

ڕاگەیێنراوی فەرمی: زیاد عەلی فازڵ، وەزیری کارەبای عێراق ڕایگەیاند: لە پلانی وەزارەتی کارەبا دایە تاوەکو ساڵی 2030 بەرهەمهێنانی کارەبا لە وزەی خۆر بگاتە 12 هەزار مێگاوات.

زانیاریی زیاتر: مانگی ڕابردوو، وەزارەتی کارەبا یاداشتێکی لێکتێگەیشتنی لەگەڵ گرووپی UGT RENEWABLEـی ئەمریکی - بەریتانی واژۆ کرد، بۆ جێبەجێکردنی پرۆژەیەکی وزەی خۆر بە توانای سێ هەزار مێگاوات و دروستکردنی سیستمی کۆگاکردنی وزە پاتری بە توانای 500 مێگاوات جگە لە دامەزراندنی هەزار کیلۆمەتر هێڵی گواستنەوەی کارەبای ڕاستەوخۆی ڤۆڵتیەی بەرز (HVDC).