پسپۆڕێکی فڕۆکەوانی: ڕاگرتنی گەشتەکان ملیۆنان دۆلار زیان بە عێراق دەگەیێنێت

ئاڤا نیوز

پسپۆڕێکی فڕۆکەوانی دەڵێت، جگە لە کەمبوونەوەی داهاتی فڕۆکەخانەکان و سەختی گەشتکردن، تەنیا چۆڵبوونی ئاسمانی عێراق لە گەشتە نێودەوڵەتییەکان مانگانە زیانی 10 ملیۆن دۆلار بە عێراق دەگەیێنێت.

وێنە گەورەکە: لەگەڵ یەکەم ڕۆژی هێرشەکانی ئیسرائیل بۆ سەر ئێران، ئاسمانی عێراق بە ڕووی هەموو گەشتەکاندا داخرا ئەوەش جگە لە زیانە مادییەکان، بووە هۆی گیرخواردنی هەزاران عێراقی کە لە فڕۆکەخانەکانی جیهان بەنیازی گەڕانەوە بوون.

لێدوانی فەرمی: فارس جەواری، پسپۆڕی فڕۆکەوانی عێراق بە ئاڤا میدیای ڕاگەیاند، بەگوێرەی کۆتا ئاماری وەزارەتی گواستنەوە ڕۆژانە 700 فڕۆکە ئاسمانی عێراق بەکاردەهێنن، هەر فڕۆکەیەکیش 450 دۆلاری لێوەردەگیرێت، بەوەش داهاتی عێراق مانگانە دەگاتە 10 ملیۆن دۆلار، بەڵام بە ڕاگرتنی گەشتەکان وڵات لەم داهاتە بێبەش دەبێت.

زانیاریی زیاتر: بە وتەی ئەو پسپۆڕە لە ئێستادا تەنیا فڕۆکەخانەی نێودەوڵەتی بەسڕە بەهۆی پارێزراوی ئاسمانی باشووری عێراق بەڕووی گەشتەکاندا کراوەیە، ئەوەش خەرجی گەشتکردنی لەسەر هاووڵاتیان بەرزکردووەتەوە، بۆیە حکومەتی عێراق لەگەڵ تورکیا لێکتێگەیشتنی کردووە بۆ ئەوەی ئاسانکاریی بۆ عێراقییەکان بکرێت و بەشێک لە گەشتە نێودەوڵەتییەکان لەوێوە بۆ وڵاتانی جیهان ئەنجام بدرێن، واتە گەشتیارانی عێراق دەچنە تورکیا و لەوێوە گەشتەکانیان ئەنجام دەدەن.