درۆنێک لە سنووری دووکان کەوتە خوارەوە

ئاڤا نیوز

لە سنووری ناحیەی بنگردی سەر بە قەزای دووکان و قەزای شارباژێر لەلایەن چەند هاووڵاتییەکەوە درۆنێکی قەبارە بچووک دەدۆزرێتەوە، لە ماتۆڕێکی بچووک و پەروانەیەک پێکهاتووە و تائیستا نازاندرێت درۆنەکە درۆنی کام وڵاتە.

چیرۆکی سەرەکی: بەهۆی جەنگ و ئاڵۆزی نێوان ئێران و ئیسرائیل و بەهۆی هەڵکەوتەی سنووری کوردستان، لە ئەنجامی بۆردوومانی بەردەوامی هەردوولا، لەچەند ناوچەیەکی کوردستان درۆن کەوتوونەتە خوارەوە و تا ئێستا ڕووداوی نەخوازراوی لێنەکەوتووەتەوە .

لێدوانی فەرمی: محەممەد عەبدولڕەحمان، بەڕێوەبەری ناحیەی بنگرد بە ئاڤا میدیای ڕاگەیاند" ئەو ناوچەیەی درۆنەکەی لێکەوتووەتە خوارەوە بەدیاریکراوی کوێستانەکانی سنووری گوندی گۆمەزەڵ وسنووری شارباژێر دەگرێتەوە، هێزە ئەمنیەکان گەیشتوونەتە شوێنی ڕووداوەکە  و دەرکەوتوە درۆنەکە قەبارەیەکی زۆر بچووکی هەبووە و لە ماتۆڕێکی بچووک و پەروانەیەک پێکهاتووە، درۆنەکە هێندەی ماتۆڕێکی ئاو دەبێت.

زانیاریی زیاتر: بەڕێوەبەری ناحیەی بنگرد ئاشکراشی کرد، بەهۆی ئەوەی هیچ ناونیشانێک لەسەر درۆنەکە نەبووە، نازاندرێت لەکوێیوە هاتووە و هی کام وڵات و لایەنە، هاوکات هیچ زیانێکی گیانی و ماددی بەدوای خۆیدا نەهێناوە و ناوچەکەش چۆڵ و دوورە لەشوێنی نیشتە جێبوون.