کۆمیسیۆن وادەی تۆمارکردنی لیست و هاوپەیمانێتییەکانی درێژکردەوە

ئاڤا نیوز

کۆمیسیۆنی هەڵبژاردنەکانی عێراق، وادەی پێشکەشکردنی ناوی بەربژێرانی  هاوپەیمانی و حیزبەکانی بۆ هەڵبژاردنی پەرلەمانی کوردستان تا 28ـی ئەم مانگە درێژکردەوە.

وێنە گەورەکە: تەنیا دوو ڕۆژ ماوە بۆ پێشکەشکردنی لیستی ناوی بەربژێری هاوپەیمانی، حیزب و بەربژێرە سەربەخۆکان، کۆمیسیۆن ئەو ماوەی درێژکردەوە بۆ ئەوەی سەرجەم لایەنەکان بە پێشکەشکردنی لیستەکانیان ڕابگەن.

لێدوانی فەرمی: "بە بڕیاری ئەنجوومەنی کۆمیسیاران وادەکە تاوەکو ڕۆژی پێنجشەممە 28-03-2024 درێژکرایەوە، ئەو بەروارە دوایین وادەیە بۆ قبوڵکردنی لیست و ناوی بەربژێرانی هاوپەیمانی و حیزبەکان و کاندیدانی سەربەخۆ." جومانە غەلای، گوتەبێژی کۆمیسیۆنی باڵای سەربەخۆی هەڵبژاردنەکانی عێراق وای بە ئاڤا نیوز گوت.

زانیاریی زیاتر: دوای تەواوبوونی وادەکە، لە هەولێر پڕۆسەی تیروپشک بۆ ژمارەی لیستی لایەنە بەشداربووەکانی هەڵبژاردن ڕادەکێشرێت. ژمارەی لیست لە 101 دەستپێدەکات و بۆ سەرەوە دەبێت. ئەمەش بە گوتەی جومانە غەلای.

زانیاریی بەدەستهاتوو: ئاڤا نیوز لە چەند سەرچاوەیەک زانیویەتی تا ئێستا هیچ لایەنێک لە سنووری پارێزگاکانی هەولێر و دهۆک، لیستی ناو و ژمارەی بەربژێرانی پێشکەش بە کۆمیسیۆن نەکردووە.

باكگراوند: بەپێی بڕیاری سەرۆكایەتی هەرێمی كوردستان، ڕۆژی 10-6-2024 بۆ هەڵبژاردنی خولی شەشەمی پەرلەمانی كوردستان دیاریكراوە.