درۆنێک لە نزیک کۆیە دەکەوێتە خوارەوە

ئاڤا نیوز

تەنها لەماوەی چەند کاتژمێر ڕابردوودا چەند درۆنێک لە سنووری هەرێمی کوردستان کەوتوونە خوارەوە و ناسنامەیان دیاری نەکراوە. 

وێنە گەورەکە: بەهۆی جەنگ و ئاڵۆزی نێوان ئێران و ئیسرائیل و بەهۆی هەڵکەوتەی سنووری کوردستان، لە ئەنجامی بۆردوومانی بەردەوامی هەردوولا، لەچەند ناوچەیەکی کوردستان درۆن کەوتوونەتە خوارەوە و تا ئێستا ڕووداوی نەخوازراوی لێنەکەوتووەتەوە.

چیرۆکی سەرەکی: ئێوارەی ئەمڕۆ پێنجشەممە نزیک کاتژمێر 7 درۆنێک لە سنووری گوندی تازەی دێی سەربە ناحیەی سێگرتکانی سەربە قەزای کۆیە کەوتووەتەخوارەوە، بەهۆیەوە هاونیشتمانیانی ئەو ناوچەیە گوێ بیستی دەنگەکەی بوون. 

 

لێدوانی فەرمی: تاریق حەیدەری، قائیمقامی قەزای کۆیە بە ئاڤای ڕاگەیاند: درۆکە لە نزیک گوندی تازەدێ کەوتووە خوارەوە و بەهۆیەوە ئاگرێك کەوتووەتەوە، تیمەکانی بەرگریی شارستانی گەیشتوونەتە شوێنی ڕووداوەکە و ئاگرەکە کۆنترۆڵکراوە. 

٠ تاوەکو ئێستا ناسنامەی درۆنەکە دیار نییە و لێکۆڵینەوە لە ڕووداوەکە بەردەوامە. 

لەلایەکی دیکەوە: هاونیشتمانییەکی گوندی تازەدێ بە ئاڤای ڕاگەیاند: دوای ئەوەی دەنگی تەقینەوەیەک لە نزیک گوندەکەمان بیسترا، دەرکەوت درۆنێکی قەبارە بچووک کەوتووەتە خوارەوە و ئاگر لە پووش و پاوانی گوندەکەمان کەوتووەتەوە. 

نوێدەکرێتەوە..