زاوای ترەمپ پێشنیاز دەکات  غەززە بكرێتە شوێنێكی گەشتیاری

ئاڤا نیوز

زاوای دۆناڵد ترەمپ لەبارەی كەرتی غەززە و بەردەوامی شەڕ قسەی هەیە و دەڵێت، ئەگەر من لە بری ئیسرائیل بوومایە، كەرتەكەم بە هاووڵاتیان چۆڵ دەكرد و دەمکردە شوێنێکی گەشتیاری.

چیرۆکی سەرەکی: جارید کوشنەر، زاوای دۆناڵد ترەمپ، سەرۆکی پێشووی ئەمریکا و ڕاوێژکاری پێشووی سیاسەتی دەرەوە، باسی دۆخی کەرتی غەززە دەکات و بەپێویستی دەزانێت کەرتەکە و ناوچەی ڕەفەح بەتەواوی چۆڵ بکرێن.

ئەوەی پێویستە بیزانیت: كۆشنەر خاوەنی بیرۆكەی "گرێبەستی سەدەیە"، پڕۆژەیەك بوو بۆ دروستکردن و دامەزراندنی دەوڵەتێك بۆ فەڵەستین لە بیابانی سینا، بڕیاربوو سەرۆكی ئەمریكاش سەردانی بکات و وەك دەوڵەتێكی سەربەخۆ دانی پێدا بنێت.

لێدوانی فەرمی: جارید كۆشنەر لە لێدوانێکی نوێدا  بەپێویستی دەزانێت "ئیسرائیل دۆخی فەڵەستن ڕێكبخاتەوە و غەززە لە خەڵكەكەی پاكبكاتەوە" و دەڵێت: "ئەگەر من بومایە خەڵکم لە غەززەوە دەگواستەوە بۆ بیابانی نەگێڤ (بەشێکە لە بیابانی سینا) و ناوچەکەم پاک دەکردەوە".

بابەتی سەرەکی: کۆشنەر كەرتی غەززە بە شوێنێكی ستراتیژی گرنگ و بە بایەخ دادەنێت و دەڵێت: لەسەر دەریایە، ئەگەر بكرێتە شوێنی گەشتیاری بەهایەكی زۆر بەرزی دەبێت". جەختیش دەکاتەوە وەک ئەو ئاگادارە نەتانیاهۆ ڕێگە نادات فەڵەستینییەكان بگەڕێنەوە كەرتەكە.

ئەمەش بزانە: جارید كۆشنەر بە ڕەچەڵەك جووە، یەكێك بوو لە سیاسییە گەورە و باوەڕپێكراوەكانی سەردەمی تڕەمپ لە كۆشكی سپی، ئاگاداری ورد و درشتی بابەتەکان بوو، ڕۆڵێكی گرنگی هەبوو لە سەردانی ترەمپ بۆ ئیسرائیل و گواستنەوەی كونسوڵخانەی ئەمریكا بۆ ئۆرشەلیم.